Iker Markinezek arroza eta otarrainxkak oinarri hartuta prestatu du aste honetako errezeta.
Arroz ekologiko borobila (bonba motakoa), 400 g Otarrainxkak, bi dozena Kalabazin bat Ziazerba sorta bat Azenario bat Tipulin bat Lekak, eskukada bat Pipermorro gorri bat Baratxuriak, bi ale Tomate saltsa Gatza Oliba olio birjina
Errezeta honetan «gure» esatean, gertuko arroza erabili dugula nabarmendu nahi dugu. Izan ere, geuk prestatua izateaz gain, Euskal Herrian ekoitzitakoa da arroza, Nafarroako Arguedas herrian, hain zuzen ere. Beraz, gertuko eta kalitatezko arroz mota hau probatzera animatzen zaituztet.
Kalabazina eta azenarioa garbitu, eta azenarioa zuritu. Karratu txikietan moztu. Gauza bera egin pipermorroarekin eta lekekin. Lekei alde bietako punta kendu. Tipulina eta baratxuri aleak ere zuritu eta xehatu.
Lapiko batean oliba olio txorrotada bat berotzen jarri, eta, ondo berotu ondoren, barazkiak bota. Gatz pitin bat gehitu. Hasieran, bost minutuz su bizian erregosi barazkiak, eta, ondoren, sua moteldu eta lapikoan bertan erregosi, tapaz estali gabe, hogei bat minutuz. Bitartean, otarrainxkei burua eta azala kendu. Gorputza gorde, eta azalak eta buruak lapiko batean urez estali; irakiten jarri, gutxi gorabehera hamar minutuz. Ondoren, iragazi eta ur egosia gorde.
350 gramo arroz bota erregositako barazkiak dauden lapikora. Arroza eta barazkiak sutan pare bat minutuz erregosi, eta nahastu. Tomate saltsa pixka bat bota; kazo txiki bat. Etxean egina bada, askoz hobeto. Komeni da tomatea ondo loditua izatea. Hori ere ondo nahastu, eta otarrainxkak egosi diren salda bota, arrozaren neurria halako bi edo pixka bat gehiago. Guztia nahastu, gatz pitin bat bota, eta su ertainean irakin, 17-18 minutuz, taparik gabe. Ondoren, sua itzali, eta bost bat minutuz lapikoan bertan utzi.
Otarrainxkak frijitzeko aprobetxatu momentu hori. Horretarako, zartagin batera oliba olio txorrotada bat bota, eta otarrainxkak bertan frijitu, pare bat minutuz, gatz pitin batekin. Platereratzeko, arroza menditxo itxuran jarri modu txukun batean, eta gainean otarrainxkak jarri.
Otarrainxkak aparte prestatuta baina otarrainxka horiek egosteko salda erabilita, arrozak arrainaren zapore guztia hartuko du. Lanketa horren bidez ziurtatuko dugu arraina ez zaigula lehortuko arroza egosten ari den bitartean.
