Iker Markinezek azalorea eta kuia oinarri hartuta prestatu du aste honetako errezeta.
Azalore bat Kuia zati bat, kilo erdikoa Porruak, 4 Tipulak, 2 Azenario bat Otarrainxkak, 12 Oliba olioa Gatza Piper hauts beltza Esne gaina, basokada bat
Negu garaiko barazkiekin jolasteko beste aukera bat proposatuko dizuegu gaur. Normalean, azalorea ez da izaten barazkirik gogokoenetakoa, eta are gutxiago haurren artean. Beraz, ea prestatzeko betiko modua alde batera utzita gustukoagoa duzuen. Frantzia hegoaldeko jatetxe batean lanean aritu nintzenean, bezeroei ongietorri gisa eskaintzen genien plater hau.
Lehenik, garbitu barazkiak. Moztu porruak erditik, alde zuria eta berdea desberdinduz. Zati zuria gerorako utzi. Moztu barazki guztiak zatitxotan, eta jarri lapiko handi batean, erregosten. Bota oliba-olio txorrotada bat eta gatz pitin bat. Egosteko prozesuan pazientzia behar da. Ipini su ertainean, eta ondo erregosi guztia 30 bat minutuz, taparik gabe. Ondoren, bota basokada bat ur eta basokada bat esne gain barazkiei. Jarraian, utzi egosten beste 30 bat minutuz.
Irabiatu guztia lapikoan bertan, kremaren goxotasun puntu hori lortzeko. Irabiatu ondo eta pazientzia handiz, eta oso aukera ona da iragazkitik pasatzea ere. Krema finago geldituko da, punta-puntako.
Zuritu otarrainxkak eta gorde, moztu porruen zati zuriak xaflatan, bi zentimetroko lodieran gutxi gorabehera. Jarri oliba-olio txorrotada txiki bat zartagin zabal batean, eta, zartagina oraindik hotz dagoela, gehitu porru xaflak. Jarri sutan berotzen, ahalik eta surik motelenean, eta eduki hor hamar bat minutuz. Ondoren, eman buelta porru zatiei, eta eduki sutan beste bost bat minutuz. Atera eta gorde.
Zartagin berean, baina oraingoan sua pixka bat bizituta, erregosi otarrainxkak pare bat minutuz, gatz pitin bat gehituta.
Azken pausorako, jarri krema mahaiko ontzitxo batean, porru zatiak kremaren inguruan, eta otarrainxkak erdian. Azken ukitu gisa, gehitu piper hauts beltza eta oliba-olio txorrotadatxo bat.
