ERREZETA

Txerri azpizuna labean, rostiarekin

ANDONI CANELLADA / ARGAZKI PRESS

Iker Markinez - Kuko Jatetxea, Ormaiztegi

2014ko ekainak 21
Lehenik, patatak egosiko ditugu, azal eta guzti. Ondo egosiak daudenean, hozten utzi. Edo aurreko egunetik ere egositakoak erabil ditzakegu.

Ondoren, labeko erretilu batean baratxuri burua jarri, eskuarekin kolpe batzuk emanda.

Erretiluan bertan, tipula eta azenarioa zuritu, eta, txikitu ondoren, horiek ere erretilura gehitu.

Azpizunei gatza eman eta piper hautsez ongi hornitu. Barazkien gainean jarri, eta oliba olio gainetik bota.

Labean sartu 250 gradutan, 15 minutuz.

Bitartean, rostia prestatzeari ekingo diogu. Rostia Europa erdi aldean oso ezaguna da, eta patata beste modu batean prestatzeko aukera emango digu. Horretarako, egositako patatak zuritu, xehetu eta ontzi batean sartu. Gatza eta piper hauts beltza bota gainetik.

Gurin koilarakada bat zartagin batean berotu, eta urtzean, patata dugun ontzira gehitu. Ongi nahastu ondoren, eta dena zartaginera bota berriz.

Koilara baten laguntzaz dena ongi zabaldu, patata tortilla baten itxura emanez.

Pataten beheko aldea ongi gorritu arte sutan eduki, gutxi gorabehera lau bat minutuz; horixe da rosti goxo baten sekretua.

Ondoren, buelta eman, eta pauso berbera berriro egin beste aldea ere gorritu arte.

Labeko azpizunak atera, eta labanarekin xerra lodietan moztu.

Mahaira zerbitzatzeko, azpizuna erretilu batean rostiaren aldamenean jarri, eta prest daukagu jateko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna