Iker Markinezek otarrainxkak oinarri hartuta prestatu du aste honetako errezeta.
Itsas zapo bat (kilo eta erdi ingurukoa) Otarrainxkak, 12 Tipulak, bi Porru bat Azenario bat Etxeko tomate saltsa, katilukada bat Baratxuriak, hiru ale Brandy kopa bat Gatza Oliba olioa
Zapoa garbitu ondoren, burua kendu eta hiru zentimetroko xaflatan moztu, hezur eta guzti. Porrua garbitu, eta zati txuria eta berdea banatu. Porruaren zati berdeekin zapoaren burua lapiko batean jarri, eta urez estali. Ordu erdiz irakin.
Gainontzeko barazkiak garbitu, eta puska ertainetan moztu (tipula, azenarioa, baratxuria eta porruaren zati berdeak). Lapiko zabal bat olio txorrotada batekin sutan jarri, eta segituan barazki guztiak bertara bota. Dena ordu erdi batez erregosi, su ertainean. Nahastu, eta gatz pitin bat bota.
Otarrainxkak zuritu, eta burua banandu. Buru horiek barazkiak dauden lapikora bota; sua bizitu, eta osagai guztiak ongi gorritzen utzi. Ongi gorrituta daudenean, brandy kopatxo bat bota eta irakiten utzi, alkohol guztia ongi lurrundu dadin. Ondoren, tomate saltsa gehitu, eta zapoaren buruarekin egin dugun salda ere bai. Sua moteldu, eta su ertainean irakiten eduki beste ordu erdi batez. Ondoren, itzali, eta, irabiagailu baten laguntzarekin, lapikoan bertan dena irabiatu. Jarraian txinotik pasatu dena, ongi txikitzeko. Oso garrantzitsua da pauso hori, horri esker otarrainxken buru zatiak eta azalak txinoan bertan geldituko baitira. Amerikar saltsa krematsua lortuko dugu horrela.
Beste lapiko batean oliba txorrotada fin bat ipini. Itsas zapoaren puskei gatz pitin bat bota bi aldeetatik, eta, lapikoa bero dagoenean, puska guztiak bertan jarri; lau bat minutuz bakarrik frijitu, alde bakarretik. Orduan, otarrainxkak bota eta jarraian baita amerikar saltsa ere, zapo puskak estaltzeraino. Tapatxo bat jarri, eta zortzi bat minutuz mantendu, su ertainean.
Zapo puskatxoak platerera ateratzean, amerikar saltsa ongi bota zati guztien gainetik. Edozein arrain presta daiteke saltsa horrekin. Garrantzitsua da jakitea guk amerikar gisa ezagutzen dugun saltsaren jatorrizko izena armoricane dela.
