politika

Ezkerrak bere senatarigaia erretiratu du

Nafarroako Parlamentuak bihar hautatuko du legebiltzarrak izendatu beharreko senataria.

Aldaketa hautagaitzaren aurkezpena, martxoan. Eskuinean, Iñaki Bernal Ezkerrako senatarigaia.
Aldaketa hautagaitzaren aurkezpena, martxoan. Eskuinean, Iñaki Bernal Ezkerrako senatarigaia. Jon Urbe / Foku

Jon O. Urain -

2019ko irailak 25

Ezkerrak atzera egin du Nafarroako Parlamentuari dagokion senatariaren auzian, eta Iñaki Bernalen hautagaitza erretiratu du. Bihar dira bozketa egitekoak legebiltzarrean, eta Ezkerrak abstentziora joko du. Horrela, Arantxa Arias Navarra Sumakoa eta Koldo Martinez Geroa Baikoa izango dira hautagai bakarrak.

Biek ziurtatuta dauzkate hogeina boto; Ariasek, bere taldearen hogei parlamentariena, eta Martinezek, PSNko 11 ordezkariena nahiz Geroa Baiko bederatziena. Berdinketa egonez gero, ordea, Arias litzateke senatari. EH Bildu eta Ahal Dugu Bernali babesa ematekoak ziren, baina espero da, Ezkerrak hautagaia erretiratu eta gero, parlamentuak Martinez aukeratzea. Gehiengo soila nahikoa du horretarako.

Koldo Martinez Eskoriatzan jaioa da (Gipuzkoa, 1953), medikuntza doktorea eta medikuntza intentsiboko espezialista. Bioetikako Europako masterra du, bai eta Giza Sexualitateko masterra ere. 2015eko foru hauteskundeen ondoren, foru parlamentaria izan da, eta, legegintzaldi hartan, Geroa Bairen bozeramailea izan zen Nafarroako Parlamentuan.

Marisa de Simon Ezkerrako bozeramaileak aitortu du, Espainiako Gorteetarako hauteskundeak berriro egingo direnez, ez duela "inolako zentzurik" Ezkerrak bere hautagaia mantentzea. Geroa Baik, Ahal Dugu-k, EH Bilduk eta Ezkerrak Aldaketa hautagaitza bateratua aurkeztu zuten apirilaren 28ko bozetan.

Hala ere, De Simonek erantsi du "dezepzio handia" izan dutela "gertatutako guztiarekin", eta gogor mintzatu da: "Agerikoa zen Aldaketa hautagaitzari buruzko akordioak sinatzaileok behartzen gintuela Iñaki Bernalen hautagaitza babestera. Ez dut esango inflexio puntu bat denik, baina talde batzuk ez dira fidatzekoak dokumentuak sinatzerakoan".

Ezkerrak eta Geroa Baik eztabaida izan dute izendapenaren inguruan, biek aldarrikatzen baitute eurentzat senatari postu hori. Ezkerrak dio aurreko agintaldian lauko gobernua babestu zuten alderdien artean adostu zutela eurek aurkeztutakoa babestuko zutela Geroa Baik, EH Bilduk eta Ahal Dugu-k. Geroa Baik, ordea, argudiatzen du hori ahalbidetzen zuen akordioa bertan behera geratu zela eta euren kide batek ordezkatu behar duela. Geroa Baik eta PSNk negoziatu dute sozialistek Martinezi babestea.

Aldaketaren lau alderdiek zerrenda bateratua aurkeztu zuten Espainiako Gorteetarako hauteskundeetan Senaturako. Zerrenda horretan ordezkari bana zuten Geroa Baik, EH Bilduk eta Ahal Dugu-k, eta adostu zuten, Nafarroako Parlamenturako bozak ere egitekoak zirenez, Ezkerrarentzat izango zela parlamentuak zuzenean aukeratzen duen ordezkaria. Zerrenda bateratuak, ordea, ez zuen senataririk eskuratu, eta Geroa Baik dio horren ondorioz akordioa bertan behera geratu zela.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Donostiako Ramontxu Berri tabernan egondako 683 laguni egin ziete proba, atzo ©Gorka Rubio / Foku

Hego Euskal Herrian, 492 positibo

Berria

Pertsona bat hil da Nafarroan, uztailaren 15etik lehena. Uztailaren 27tik abuztuaren 3ra Galdakaoko Muguru tabernan izan ziren 420 laguni PCR proba egingo diete, eta Donostian PCR-ak egiten jarraituko dute Ramontxu Berriko bezeroei.

Iñigo Urkullu Eusko Jaurlaritzako lehendakaria, iragan astelehenean, Gasteizen ©Jaizki Fontaneda / Foku

«Erantzukizunerako» deia egin du Iñigo Urkulluk

Joxerra Senar

Sare sozialetan zabaldutako ohar batean, Eusko Jaurlaritzako jarduneko lehendakariak ohartarazi du «denen artean ahal den guztia» egin behar dela lehen olatuan bizitako egoera dramatikora ez itzultzeko.

 ©ARITZ LOIOLA / FOKU

Eragile guztiekin biltzeko eskatu dio oposizioak Eusko Jaurlaritzari

Olatz Esteban Ezkati

538 positibo atzeman dituzte Hego Euskal Herrian, iragan astean halako bi. Ospitaleratzeak ere bikoiztu egin dira egun batean: 103 pertsona daude erietxean.

 ©RAUL BOGAJO / FOKU

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna