A63 autobidea ostiraletik blokeatzen zuten A63ko Ultrak taldekoek alde egin bezain laster, Baionako portua blokeatu dute ELBko, Confederation Paysanneko eta Modefeko laborariek. Abenduan, dermatosi nodular kutsakorraren kontrako protokoloarengatik izan zen; joan den astean, berriz, Europako Batasuneko eta Mercosurren arteko merkataritza librerako itunagatik. Laborariak kexu dira beren lanbidea lanjerean jartzen duten legeengatik, baina, azkenean, egoera ez da aldatu: dermatosi kasu bat agertuz gero etxaldean behi saldo osoa hiltzeko agindua dute beti, eta Mercosurreko akordioa larunbatean izenpetzekoa dute Paraguain. Hala ere, laborariek ez dute indarrik galtzen, blokeo bat kendu berritan beste bat plantatzen baitute.
Hasieran Baiona hegoaldeko Mac Donald's ostatuaren biribilgunean ezarria zuten bilgunea, baina azken momentuko deialdia egitean, gaur goizean goiz, lekua aldatu dute: hain zuzen, Bokalen dira oraintxe berean laborariak, Baionako portuan, Maisica zereal biltegiaren heinean. Duela bi urte jadanik blokeatu zuten portua, leku beretik; orduan, «lansari duinak» galdegiten zituzten laborarientzat.
Baina Mercosurreko akordioa ez denez gaurko afera baizik, jadanik azpimarratu zuten zer adierazten zuen halako portu baten blokeatzeak: «Merkatu mundialaren eta liberalaren sinboloa da», azaldu zuen Laura Irigarai ELBko kideak.
Dena den, orokorra da kexua. Hala dio intersindikalak prestatutako deialdi bateratuak: «Merkataritza libretik ateratzeko, EB-Mercosurri ez! Jendetasunik gabeko politika sanitario baten kontra, mobiliza zaitezte!». Hots, herritar orori egin diete mobilizatzeko deia.
Hego Euskal Herrian ere protestak egitekoak zituzten nekazariek. A-1 errepidea ixtea zen hasierako asmoa, baina Ertzaintzak eragotzi egin die, argudiatuta ez dutela horretarako baimenik. Nekazariek ukatu egin dute hori, eta beharrezko baimenak eskatuak zituztela erantzun.
Bestalde, A63 autobidearen itxierak eragindako kamioi pilaketak arazoak eragin ditu goizean zehar eta bederatzi kilometro arteko auto ilarak egon dira behin blokeoa kenduta. Hori dela eta Bidegik jakinarazi du itxi egin duela Biriatuko pasabidea 3'5 tona baino gehiagoko ibilgailuentzat.
