IMI Systems LTD Israelgo armagintza enpresak obusak egiteko erabili zuen Sidenorrek bidalitako altzairua. Palestinako okupazioaren aurkako elkartasun sareak (RESCOP) zabaldu duenez, eta BERRIAk kontsultatu dituen iturri judizialen bitartez berretsi duenez, Espainiako Poliziak otsailaren 10ean Sidenorrek Basaurin (Bizkaia) duen egoitzan aurkitu zuen agiri batean ageri da informazio hori. Agiri horrek, halaber, frogatuko luke altzairutegiak Israelera bidali aurretik bazekiela zertarako erabiliko zuten altzairu hori.
Iñigo Molero Sidenorren zuzendari nagusiaren bulegoan aurkitu zuten agiria; mezu elektroniko bat da, paperean inprimatua. Agiria armagintza sektoreko hainbat bezeroren zerrenda bat da, herrialdeka sailkatuta dago, eta alboan haren erabilera agertzen da «pieza» izenburupeko zutabe batean. Israelen epigrafean, IMI Systems LTDren lerroan, ‘obusak’ hitza ageri da erabileraren zutabean. Are gehiago, Israelgo beste enpresa bat ere ageri da, Israel Weapon Industries, eta hark ere obusak egiteko erabili zuen altzairua.
Erlazionatuta
Zerrendan hamar herrialdetako hogei armagintza enpresa ageri dira, baita Euskal Herrikoak ere. Agiri hori mezu elektronikoen kate bateko zati bat da, eta azken mezua 2025eko martxoaren 5ekoa da. RESCOPek adierazi du beste altzairu bidalketa horiek ere ikertu beharko liratekeela, argitzeko ea Espainiako Gobernuaren defentsa materialaren atzerriko merkataritza batzordearen onespenarekin bidali ziren ala ez.
IMI Systemsi dagokionez, eta BERRIAk zabaldu zuenez, Sidenorrek 42 aldiz bidali zion altzairua 2023ko otsailetik 2025eko ekainera. Bidalketa horietatik 33 2023ko azarotik aurrerakoak izan ziren, hau da, Gazako genozidioa hasi ostekoak. Guztira 4.587 tona altzairu bidali zizkion Sidenorrek IMIri, eta 5,8 milioi euro jaso zituen trukean.
Fiskaltzaren oztopoak
Comunitat Palestina de Catalunya-Terra Santa elkarteak kereila bat jarri zuen bidalketak salatzeko, eta Espainiako Auzitegi Nazionalak ikerketa hasi zuen. Francisco de Jorge epailea ari da Jose Antonio Jainaga Sidenorreko presidentea, Marco Pineda zuzendari orokorra eta Iñigo Molero zuzendari komertziala ikertzen, bi delitu egin zituztela uste duelako: kontrabandoa eta gizadiaren aurkako delitu baten konplize izatea. Hirurek iazko azaroaren 12an deklaratu zuten epailearen aurrean, eta ukatu egin zuten deliturik egin izana. Haien inplikazioa argitzeko, Basauriko altzairutegia miatzeko eskatu zuen epaileak otsailaren 10ean, eta bertan aurkitu zuten bidalketen agiria.
Auzitegi Nazionaleko fiskaltza Sidenorren egoitza nagusian eginiko ikerketaren aurka agertu zen, eta, RESCOPek salatu duenez, Gazatik ihes egin behar izan zuen palestinar batek epaiketan deklaratu dezan oztopatzen ari da. Espainiako legediaren arabera, genozidio eta gizadiaren aurkako delituak epaitzeko biktima zuzena izan den pertsona batek jarri behar du kereila. Pertsona horrek martxoaren 2an deklaratuko du, eta Auzitegi Nazionalak haren biktima izaera onartzen badu, Sidenorreko buruak genozidio delitu baten konplize izateagatik epaitu ahalko lituzke.
Gauzak hala, RESCOPek eta Israelekiko arma merkataritza amaitzearen aldeko plataformak bost eskaera zehatz egin dituzte. Batetik, auzibidea fiskaltzaren oztoporik gabe egin dadila eta behar adina diligentzia egin daitezela eskatu dute. Bestetik, erakunde publikoek Sidenor lehiaketa publikoetatik atera beharko luketela uste dute.
Espainiako Giza Eskubideen eta Memoria Demokratikoko fiskaltzari eskatu diote Palestinako herriaren aurka eginiko gerra krimenak ikertu ditzala, eta epaitegiek ikertu ditzatela Espainiako enpresek Israelgo armagintza sektorearekin izandako harremanak. Azkenik, Espainiako Gobernuari dei egin diote hartu beharreko neurriak har ditzan Espainiako enpresak Palestinako herria jasaten ari den genozidioaren konplize izatea eragozteko.
