Enpresaburuak apur bat ezkorrago daude urte amaieran

Laboral Kutxaren arabera, enpresen konfiantza indizea ia bi puntu txikiagoa da aurreko hiruhilekokoarekin alderatuta. Enpresen %43,6k uste dute beren egoerak okerrera egingo duela urtea amaitu bitartean.

Laneko arropak, metalgintzako enpresa batean. MARISOL RAMIREZ / FOKU
Laneko arropak, metalgintzako enpresa batean. MARISOL RAMIREZ / FOKU
Eneko Imaz Galparsoro
2026ko urriaren 28a
12:10
Entzun 00:00:00 00:00:00

Arabako, Bizkaiko eta Gipuzkoako ekonomia hazten ari da hilabeteak igaro ahala, baina erritmo apalagoan. Joera bera nabari daiteke enpresaburuen urte amaierarako aurreikuspenetan ere, Laboral Kutxaren ikerketa departamentuak enpresen konfiantza aztertzeko egiten duen inkestaren arabera. Izan ere, azterketa horretan parte hartu duten EAEko laurehun enpresen artean, %43,6k uste dute beren egoerak okerrera egingo duela urte amaierara bitarte: aurreko hiruhilekoan, galdekatutakoen %39,9k zuten aurreikuspen bera.

Laboral Kutxaren azterketan enpresaren konfiantza indizeari erreparatzen diote jakiteko nola ikusten duten egoera enpresaburuek. Urteko azken hiruhilekoari begira, indize horrek ia bi puntu egin du behera aurrekoarekin alderatuta: 55,1etik 53,3ra. Halere, indizea 50etik gorakoa bada, hazkundea adierazten du, eta eurogunean lortutakoa —53,1— baino apur bat gainetik dago.

Salmenten kopuruari dagokionez, enpresaren fakturazioa apaltzea espero duten enpresaburuak halako bi dira salmenta handiagoak egingo dituztela uste dutenak baino: hain zuzen, %29,3. Aurtengo hirugarren hiruhilekoari begira, ordea, gehiago ziren fakturazio handituko zutela uste zuten enpresaburuak (%30,9); kontrara, gehiago ziren salmentak murriztea espero zutenak (%16,3).

Enpleguari dagokionez, INEren arabera, inoizko landun gehien zeuden hirugarren hiruhilekoan EAEn, baina langabeen kopuruak ere gora egin du. Laboral Kutxaren arabera, bilakaera horrek eragina izan du enpresen asmoetan, %6,2k uste baitute urte amaierara bitarte kaleratzeak egingo dituztela, aurreko hiruhilekoan baino 2,5 puntu gehiagok; haatik, enpresen %82,7k langile taldeari eusteko asmoa dute, eta %11,1ek hura handitzea.

Kazetaritza etikoaren arabera sortua

Nola bermatzen dugun edukien kalitatea

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Zure babes ekonomikoari esker egiten dugu kazetaritza konprometitua. BABESTU BERRIA