Martxoaren 26an Arabako, Bizkaiko eta Gipuzkoako taxilariak errepidera aterako dira, baina kasu honetan protesta egitera. Donostian mobilizatuko dira, Taxisten Euskal Federazioak deituta. Talde horretako kideek ibilgailu gidaridunen (IG) plataformen —Cabify eta Uber— «intrusismoa» salatu dute, eta ohartarazi horrek kalte egingo diela taxilariei ez ezik zerbitzu horren erabiltzaileei eta «herritar guztiei oro har» ere.
Komunikabideetara bidalitako ohar batean, erakundeetako arduradunen jarrera kritikatu dute. «Izugarri harritzen gaitu nola onartu dituzten plataforma hauek. Uberrek Herbehereetan du egoitza fiskala, eta han deklaratzen ditu irabaziak. Gainera, IG baimenak dituzten enpresa gehienak Madrilen daude, eta, beraz, ez dute gure lurraldeetan zergarik ordaintzen. Ondorioz, gure ekonomiari ez zaio batere onurarik iritsiko».
Ikusi gehiago
Donostian otsailaren 18an hasi zen Uber bere zerbitzua ematen. Aurretik, Bilbon, Iruñean, Baionan eta Miarritzen sartu ziren IG plataformak. Taxisten Euskal Federazioak Jon Insausti Donostiako alkateari leporatu dio «interesik azaldu ez izana plataforma horiek legedia zorrotz bete dezaten».
Ikusi gehiago
Federazioak gogor kritikatu du politikariek «taxiaren zerbitzuarekiko konpromisoa agertzea eta aldi berean eta IGen araudia betearazteko asmoari uko egitea». Beste leku batzuetan oso bestelako jokabidea izan dutela nabarmendu du, «Iruñean eta Vigon [Galizia], esaterako». «Hiri horietan administrazioek kontrol eta inspekzio zorrotzak ezarri dizkiete IG plataformei, ibilgailuak geldiaraziz eta, araudia betetzen ez badute, isunak ezarriz».
Talde horretako kideen arabera, plataforma horiek eskaintzen dituzten zerbitzuak «nabarmen prekarioak dira, bai erabiltzaileentzat, bai langileentzat». Gainera, ohartarazi dute haien jarduna baimentzeak «bertan erregulatzeko ahalmena galtzea» ekarriko duela, eta horrek, neurri batean, «eskumenen zentralizazioa defendatzen duten ideologiekin bat egiten» duela.
