Agaleus taldeak jakinarazi du ingurumen baimena lortu duela Bilboko portuan hondakinak tratatzeko planta bat eraikitzeko. Taldearen arabera, 20 milioi euro baino gehiagoko inbertsioa egingo du egitasmoa gauzatzeko, eta ehun langile inguru izango ditu; gaineratu du horrek «bultzada handia» emango diola inguru horretako ekonomiari eta ingurumenari.
Bilboko Zorrotza auzoko Sader eta Profersa enpresen jabea da Agaleus taldea. Bi enpresa horiek oso kutsatzaileak dira, eta arazo ugari eman dituzte; Profersak, esaterako, isuria izan zuen 2024ko udaberrian. Auzokideek behin baino gehiagotan eskatu dute bi enpresa horiek Zorrotzatik ateratzeko; izan ere, ez dute ulertzen nolatan dauden hirigunean hain enpresa kutsagarriak.
Ikusi gehiago
Agaleus taldea aspalditik ari da arazoa konponduko duen irtenbide baten bila. Profersak ongarriak egiten ditu, eta hura behin betiko ixtea da taldearen asmoa. Sader, berriz, hondakinen tratamenduan aritzen da, eta horren jarduera Bilboko portura eraman nahi zuten, han hondakin planta bat eraikita.
Baina egitasmoak baditu aurkariak ere. Portuaren inguruko udalerriak ez daude pozik horrekin, eta, proiektua plazaratu zenean, hari alegazioak aurkeztu zizkioten Getxok, Santurtzik eta Zierbenak. Planta berria herriguneetatik oso hurbil egotea eta horrek herritarren ongizateari egin diezaiokeen kaltea dira udalerrien kezka nagusiak. Orain, baina, egitasmoak badu Eusko Jaurlaritzaren Industria, Trantsizio Energetiko eta Jasangarritasun Sailaren oniritzia, eta horrek, Zorrotzan dagoen gatazka konpontzeko balio badezake ere, beste gatazka bat sor dezake aipatutako herrietan.
