Igandean Barakaldon (Bizkaia) gertatutako hilketa matxista salatzeko, Euskal Herriko Emakumeon Mundu Martxak kaleak hartzeko deia zabaldu du, eta hainbat mobilizazio antolatu ditu Barakaldon bertan eta Bilbon, Gasteizen, Iruñean eta Donostian. Barakaldoko mobilizaziorako deia Argitan herriko emakumeentzako aholku etxearekin batera egin du.
Ikusi gehiago
Lehenengo protesta Donostian egingo dute: 18:30ean elkartuko dira, Bulebarrean. Barakaldon, Bide Onera plazan hasiko da mobilizazioa, 19:00etan. Handik ordu erdira elkartuko dira Bilbon —Unamuno plazan— eta Gasteizen —Andre Maria Zuriaren plazan—. Gaurko mobilizazioetan azkena Iruñean egingo dute: 20:00etan, Udaletxe plazan. Barakaldoko Udalak, berriz, 12:00etarako deitu ditu herritarrak, indarkeria matxista gaitzesteko elkarretaratzea egiteko.
Euskal Herriko Emakumeon Mundu Martxa elkarteak antolatutako deialdiekin bat egin dute Euskal Herriko Gazte Feministek eta Itaiak. Azken horrek, hiriburuetan ez ezik, beste herri batzuetan ere egingo ditu elkarretaratzeak: Azkoitian, Tolosan (Gipuzkoa), Altsasun, Lizarran (Nafarroa) eta Gernika-Lumon (Bizkaia), besteak beste.
Legebiltzarrean ere bai
Eusko Legebiltzarrean, datorren urteko aurrekontuak onartzeko saioa egin dute gaur, baina atzoko hilketa salatzeko tartea ere hartu dute. Saioaren hasieran, Legebiltzarreko lehendakari Bakartxo Tejeriak adierazpen instituzional bat irakurri du, eta, horren ostean, minutu bateko isilunea egin dute.
Aurrekontuen saiora sartu aurretik, Bingen Zupiria Segurtasun Sailburuak baieztatu egin du atzo atxilotu zuten gizonak bortxa erabili zuela emakumeak «bizitza galdu zuen arte»; oraindik epailearen aurretik igarotzeko zain dago atxilotua. Eta iragarri du gaur bertan eramango dutela akusatua epailearen aurrera.
Barakaldoko Udalak adierazi du auzian parte hartuko duela, herri akusazio gisa.
