Eguzki eklipserako ordu batzuk baino ez dira falta, baina, eguerdian, betaurrekoak buruhauste iturri dira oraindik Bilbon. Ez da inor ikusten horiek jantzita; bai ordea, horien bila. Cristina Uviñasek bereak enkargatuak zituen Ertzilla kaleko optika batean, baina jasotzerakoan galdetu du ea azkenean ez ote dituzten erretiratu, egunkarian irakurri duela. Arrazoi du: instituzio batzuek hainbat betaurreko modelo debekatu dituzte, eta gaur debekatu duten modeloaren frankiziakoak jopuntuan izan dituzte Balear uharteetan (Herrialde Katalanak). Ez Euskal Herrian. Baina, hala ere, kezka agertu du emakumeak. Saltzaileak ezetz esan dio, agian beste denda baten arazoa izan dela, eta beste lankide batek azalpenak eman dizkio dendara ostean sartu den eta elkarrizketa entzun duen lagun bati: argitu dio betaurreko ilunegiak izateagatik erretiratu dituztela, jendeak kentzeko arriskua dagoelako. «Beraz, betaurrekoak izatez ez dira arriskutsuak». Baina albisteak ezustean harrapatu du, dena den. Arduradunei deitzen saiatu da, eta ez du erantzunik jaso. Hala izatekotan, erosleei dirua itzuli beharko dietela esan du azkenean.
Bilbon, eklipse osoak ez du minutu bat ere iraungo; baina, hala ere, agerikoa da sukarra. Besteak beste, optiketako erakusleihoetan. «Ez dira eklipserako betaurrekoak geratzen», dio beste optika baten kanpoan ipini duten kartel batek, eta mezu bera errepikatzen da hiriko beste askotan. Dena den, jendeak eskatzen jarraitzen duela azaldu du Virginia Fernandez langileak: «Hirurehun genituen eta guztiak erreserbatu dituzte».
Jendea sartu-irtenean dabil, batzuk galdezka, besteak erreserbatutakoak jasotzera; eta bada atzerritarren bat ea eklipsea non ikus dezakeen galdetzera joan dena. Azken orduan enkargatu zituen bereak Cristina Uviñasek, eta ez du plan jakinik eklipsea ikusteko, inprobisatzea baino.
«Baditut betaurrekoak, baina ez dakit azken momentuan zer egingo dudan, begiratu ala buelta eman»
NEREA UZKIAGAEklipsea ikusiko duen herritarra
Pedro Goiri getxoztarrak (Bizkaia), aldiz, argi du: «Badakit jende asko mugituko dela, baina nik Getxotik ikusiko dut, itsasoa eta bista ederrak ditugu. Ez dut behategi onena topatuko agian, baina nahikoa zait». Nerea Uzkiagak ere ez du mugitzeko asmorik: arratsaldeak Plentziako hondartzan (Bizkaia) pasatzen ditu, eta bertan geratuko da eklipsea heltzean. Gogotsu zen, eta orain beldur da: «Baditut betaurrekoak, baina ez dakit azken momentuan zer egingo dudan, begiratu ala buelta eman». Eusko Jaurlaritzak ez mugitzea aholkatu du. Mendiak, hondartzak, itsaslabarrak... beteta egotea espero da.
Eklipse turismoa
Momentuz, turismo bulegoak dira gainezka daudenak: asko Bilboko jaietako programa eske doaz, beste asko, eklipsearen inguruko informazio bila: nondik ikusi, nola joan... Izan ere, badira eklipsea aitzakiazat hartuta Euskal Herrira etorri direnak.
Katia eta Rob Ebraert, ama eta semea, esaterako, Gantetik (Belgika) etorri dira bi egunerako, espresuki eklipsea ikustera. Katiak eguzki eklispe bat ikusi zuen Frantzian duela urte batzuk, eta bere semeak esperientzia berbera izatea nahi zuelako etorri dira biak Euskal Herrira. Euren asmoa bizikletaren bat alokatu eta toki politen batera joatea da, mendiren batera, akaso.
Italiatik etorri da Alessandra —ez du abizena eman nahi izan—, eguzki eklipsea ikusteko toki onena zela jakin zuelako, eta eskualdea ez zuelako ezagutzen. Azken orduko zalantzak argitzeko sartu da turismo bulegoan.
