CFDT sindikatuak bultzatutako greba aldia bukatu da Donibane Lohizuneko poliklinikan. Gaur 07:00ak arte egon dira greban, eta, azkenean, horretan geratu dira: CFDTkoek adierazi dutenez, zuzendaritza engaiatu da kudeaketa sistemaren berrikustera.
Horrez gain, erran dute ahaleginak eginen dituztela larrialdi zerbitzua irekita mantentzeko. Berez zuzendaritzak ez zuen borondaterik erakutsi kontratua berritzeko, eta, beraz, zerbitzua hetsirik geratzeko arriskuan zegoen irailaren 16tik goiti.
Atzo Eskualdeko Osasun Agentziak jakinarazi zuen «laster» biltzekoa dela Donibane Lohizuneko poliklinikaren zuzendariarekin. Hain zuzen, ikusi beharko da zer akordiotara iritsiko diren.
