PSOEko Antolakuntza idazkari ohi Santos Cerdanek berriro eskatu dio Espainiako Auzitegi Gorenari aske uzteko. Bigarren helegitean, Koldo auzia ikertzen ari den epaileari esan dio kartzelan jarraitzea «konstituzioaren aurkakoa» dela, legezko epea gainditu delako eta «ez dagoelako frogarik» haren aurka. Cerdanen defentsak uste du «halabeharrez» hartu behar luketela Cerdan «berehala» aske uzteko erabakia, epaileak ustelkeriaren hipotesia frogatzeko eman duen epea «eman ahal den handiena» baita. Defentsak azpimarratu du epea bukatu dela, «ez dagoela frogarik», eta Cerdanen aurkako ekinbidean «ez bada aurkakorik frogatzen, oinarrizko eskubide ugari urratu» dizkiotela.
Ikusi gehiago
Auzitegi Gorenera igorritako helegitean jaso du defentsak bere iritzia Cerdanen aurkako ekinbideen inguruan: «Epaitzeko tresnak estrategikoki bortxatu dira ondorio jakin batera iristeko, eta, horregatik, egoera larri honi amaiera ematea baino ez da geratzen». Halaber, Cerdanen defentsak helarazi du auzia ez dagoela jada hasierako fase batean, eta kartzelan egoteko neurriak ez duela jada justifikaziorik. Uste du Poliziak denbora nahikoa izan duela ikerketa egonkortzeko, eta izan duela horretarako aukera. Horregatik, Cerdan aske ez egoteak «ez du zentzurik», haren defentsaren arabera.
Uda osoa espetxean
Santos Cerdan ekainaren 30ean sartu zuten Soto del Real espetxean. Espainiako Auzitegi Gorenak uste du frogak deuseztatzeko arriskua dagoela Cerdan aske uzten badu, lekukoak manipulatu ditzakeela, eta ezkutuko funtsak mugitu, ustezko adjudikazioen ustelkeria auziari loturik. Gaur arte, ordea, Guardia Zibilak ez du aurkitu bere txostenak aditzera ematen duena: Cerdanek diru funts handi bat duela ezkutuan.
Espetxaratu eta gutxira jarri zuten Cerdan aske uzteko lehen helegitea, baina Auzitegi Gorenak atzera bota zuen, eta epaileak fidantzarik gabeko kartzela berretsi zuen. Hain zuzen, Espainiako Auzitegi Konstituzionalak lehen helegite hori aztertuko du asteon, PSOEko hirugarren agintaria izan zenaren eskaera tramiterako onartzen duen ala ez erabakitzeko.
