Gipuzkoako zortzi zahar etxe greba mugagabea egiten ari dira. Horietako sei iazko azaroaren 21etik. Lan baldintza hobeak eskatzen dituzte, eta baldintza horiek lan itun berri batean arautzea nahi dute. Sektoreko langileek hainbat mobilizaizo eta greba egun egin dituzte. ELAk beste hiru greba egun antolatu ditu: ekainaren 10ean, 11n eta 12an. Egun horietan martxak egingo dituzte Gipuzkoan.
Sindikatuko ordezkariek batzarra egin dute gaur San Telmon, Donostian. Azken asteetako negoziazioen eta ekintzen balorazioa egin dute. Soldata hobeak eta lanaldi osoko kontratuak dira langileen eskaera nagusiak. 5.000 langile dira guztira. ELAk jakinarazi du soldatetan «aurrerapauso txiki batzuk» izan direla, «grebalarien presioari eta ekintzei esker».
Hala ere, salatu du zahar etxeetan eta eguneko zentroetan lan baldintzak gero eta prekarioagoak direla, eta lanaldi partzialeko kontratuak asko hazi direla: langileen erdiek dituzte lanaldi partzialeko kontratuak. Gipuzkoako Foru Aldundiari eskatu dio «benetan» inplikatu dadila lan baldintzen negoziazioan, eta lanaldi partzialeko kontratuak desagertzeko neurriak eskain ditzala.
Senideen manifestazioa maiatzaren 30ean
Borroka luzea izaten ari da. Duela ia urte eta erdi osatu zuen lan hitzarmen berria negoziatzeko mahaia. Mobilizazio asko egin dituzte. Apirilaren 28an, esaterako, Errenteriako eta Zumaiako zahar etxeetako langileek itxialdiak egin zituzten, Errenteriakoek udaletxean eta Zumaiakoek Oxford kultur etxean.
Gipuzkoako Senideak elkarteak manifestazioa egingo du maiatzaren 30ean, Donostian. Zahar etxeetako egoiliarren eta haien snideen elkartea da. ELAk bat egin du manifestazioarekin, eta parte hartzeko eskatu die zahar etxeetako langileei eta herritarrei.
