ELA sindikatuak elkarretaratzeak egin ditu gaur, heziketa berezian ordezkoak falta dituzten Arabako, Bizkaiko eta Gipuzkoako ikastetxe publikoetan. Salatu dute Eusko Jaurlaritzako Hezkuntza Sailak ez duela ordezkorik bidaltzen hainbat lekutara, eta egoera «larria» dela Araban eta Bizkaian.
Egoeraren ondorioz, bi arazo daudela nabarmendu du sindikatuak: irakasleen lan karga «izugarri handitu» dela eta «behar bereziak dituzten ikasleei» ez zaiela «behar bezalako arreta» ematen. ELAk jakinarazi du ikastetxe batzuetan etxera bidali behar izan dituztela ikasleak, egoera «kudeaezina» delako.
Sindikatuaren iritziz, LEP lan eskaintza publikoan ez zen «behar beste postu» atera, eta ez zen «behar bezalako neurririk» hartu hitzarmen bereziaren negoziazioan.
