Maialen Mazonen hilketaren auziko epaimahaiak bart gauean eman du ebazpena: errudun jo du haren senarra, eta, Mazonen hilketaz gain, bi abortu delitu leporatu dizkio emakumea haurdun zegoelako, eta adingabe baten abandonuarena ere bai, bi urteko alaba amaren gorpuaren ondoan uzteagatik; hemezortzi orduz egon zen haurra amaren gorpuaren ondoan, bakarrik. Errudun jotzeaz gain, epaimahaiak maltzurkeria eta ahaidetasuna egotzi dizkio inguruabar astungarri gisa. Aringarririk ez du ezarri.
Epaimahaiak errudun jo ondoren, epaileak orain zigorra ezarri beharko du. Ebazpena jakin ostean, akusazioek 45 urteko espetxe zigorra ezartzeko eskaera berretsi dute, maiatzaren 4an epaiketaren hasieran eskatu bezala. Fiskaltzak eta akusazioek ondorioztatu dute akusatuak «kontzienteki» hil zuela Maialen Mazon, «berarentzat nahi zuelako». Akusatuak uko egin zion epaiketan deklaratzeari.
Ikusi gehiago
Fiskaltzak, Mazonen senideek eta Arabako Adingabeen Kontseiluaren akusazio partikularrek eta Clara Campoamor elkarteak ordezkatu duen herri akusazioak 25 urteko espetxe zigorra eskatu zuten epaiketan Mazonen hilketagatik; zortzi, abortu bakoitzagatik; eta lau bi urteko haurra abandonatzeagatik. Defentsak absoluzioa eskatu zuen, J.R. akusatua bere ekintzen jabe ez zela argudiatuta, «kolapso» egoeran zegoelako, errealitatetik deskonektatuta.
Epaiketa asteazkenean amaitu zen Arabako Auzitegi Probintzialean. Maialen Mazon 2023ko maiatzean hil zuen haren senarra zenak, bikien esperoan zela. «Maialen galduko zuela jakin zuenean erabaki zuen [akusatuak] hura hiltzea», esan zuen epaiketaren azken egunean Virginia Urtaran akusazio partikularreko abokatuak.
