Euskal Eskola Publikoaz Harro plataformak deituta, manifestazioa egin dute Bilbon, Segregazioaren kontra, publikoa da bidea lelopean. Eskoletan segregazioa amaitzeko xedez Eusko Jaurlaritzak Eskola Bikaina Denontzat izeneko eztabaida prozesua abian jarri duen honetan, plataformak argi utzi nahi izan du zein den bere jarrera: haien iritziz, eskola publikoarekin batera irakaskuntza sare pribatu bat egotea da segregazioaren arrazoi nagusia, eta, beraz, eskola publikoa lehenestea eta han baliabide gehiago jartzea da segregazioaren kontra borrokatzeko biderik eraginkorrena.
Mobilizazioaren amaieran irakurritako agirian, «herriaren eskolatzat» definitu dute eskola publikoa, eta «historian irabazitako lorpenik handienetako bat» dela erantsi: «Haren garapena berdintasunaren eta ongizatearen adierazlerik onena da». Eskola publikoaren balioak goretsi dituzte: «Askotarikoa da, integratzailea, laikoa, hezkidetzan konprometitua, berdintasunean eta kalitatean oinarritutakoa», eta ikasle guztien hezkuntza integrala eta gizarte kohesioa bermatzen ditu.
Baina, haien iritziz, Jaurlaritzak ez du eskola publikoa lehenesten, eta bi sareak, publikoa eta pribatua, parekatu nahi ditu, «berdinak balira bezala». Are gehiago: sare pribatuari «finantzaketa osoa» ematen dio prozesuaren etapa guztietan, eta planifikazioa ere «irakaskuntza itunduaren mesedetan» egiten du. Horren ondorioa da hezkuntza sistema «duala eta desorekatua» dela, sare publikoa «bigarren mailara» baztertzen duela, eta segregazioa bultzatzen.
Kritikak mahaiari
Eskola Bikaina Denontzat prozesuan Jaurlaritzak eratutako mahaia ere kritikatu dute manifestazioaren antolatzaileek: haien ustez, «osaera desorekatua» du, «diagnostiko partziala» egiten du, eta Hezkuntza Sailak egindakoa «berrestea eta ontzat ematea» du helburu nagusi. Horregatik, ez dute uste segregazioaren korapiloa askatzeko balioko duenik.
«Egiturazko arazo» horren konponbide gisa, «eskola publikoa lehenestea» proposatu dute deitzaileek: horretan baliabide gehiago jartzea, azpiegiturak hobetzea, itunpeko ikastetxeak apurka-apurka murriztea eta publiko bilakatzeko bideak eskaintzea.
