Espainiako Ministroen Kontseiluak gaur onartu du abiadura handiko trenean Gipuzkoako burdinbideak muntatzeko oinarria eraikitzeko lizitazioa. Espainiako Garraio eta Mugikortasun Jasangarriko Ministerioak 19 milioi euro ordainduko ditu kontratu horretarako.
Muntaketaren oinarria Martutenen (Donostia) egingo da, eta eraikiko den baseak bidearen muntaketa egiteko modua emango du. Gainera, balastoa biltzeko gune bat sortuko dute Ezkio-Itsasoko geltokiko (Gipuzkoa) laugarren bidean, harrizko oinarriaren gainean trenbidea muntatzeko.
Bestalde, Bergara-Astigarraga (Gipuzkoa) ibilbidean 35 puntu jarriko dituzte trabesak pilatzeko, eta trenen zamalanetarako portikoak jarriko dira, erraiak garraiatzeko.
Duela hiru hilabete, Gasteiz eta Bilbo artean egingo den oinarriaren proiekturako kontratua egin zuen Espainiako Gobernuak. Gainera, euskal Y guztiko trenbidearen elektrifikaziorako kontratua ere adjudikatu du Adif AVren bidez.
Zer falta den
Trenaren plataforma bukatuta dago Gipuzkoako adarrean, baina ez euskal Y osoan. Denera bost tarte bukatu gabe daude, eta horietatik hiru Bergarako lotunean daude, Araba, Bizkaia eta Gipuzkoa lotuko dituen lotunean. Bilborako sarrerarako eta geltoki berrirako proiektuan eta Astigarraga eta Irun arteko hirugarren erraila eraikitzeko ere lanean ari dela azaldu du Adifek.
Euskal Y-aren loturak ere bukatu gabe daude. Espainiarekin lotzeko, tarte bakarra adjudikatu da Gasteiz eta Burgos artean. Nafarroarekin lotzeko, berriz, erabaki gabe dago Arkautitik (Araba) edo Ezkio-Itsasotik lotuko den, eta bi aukeren azterketa ez da prest egongo 2026ko udaberrira arte.
