Etxerik gabeko gizon bat zendu da gaur Donostiako Easo plazan, gaua kalean igaro ostean. Autopsiak argituko du heriotzaren zergatia, baina larrialdi zerbitzuek antzemandako lehen zantzuen arabera, «kausa naturalengatik» hil da.
Eusko Jaurlaritzako Segurtasun Sailak Europa Press berri agentziari jakinarazi dionez, Ertzaintzak 09:10 aldera jaso du abisua. Ertzainez gain, anbulantzia bat ere bertaratu da. Gizona plazako kioskoan erori da, antza denez, gaua han bertan igaro ostean. Larrialdi zerbitzuek ezin izan dute ezer egin, eta mediku batek egiaztatu du gizonezkoa hila zela ordurako.
