Sare publikoko eskoletako jangeletarako «eredu osasungarriagoa, jasangarriagoa eta hurbilagoa» izatea du xede Eusko Jaurlaritzak. Horretarako, Begoña Pedrosa Hezkuntza sailburuak iragarri duenez, hogei milioi euroko inbertsioa egingo dute 2028ra arte; ikastetxeetan sukaldeak jartzen hasiko dira «pixkanaka», eta zonakako sukaldeak ere eraiki asmo dituzte.
Uda honetan bertan hasiko dituzte obrak; Pedrosaren esanetan, sei sukalde jarriko dituzte beste horrenbeste eskola publikotan. Geroago, 2025-2026ko ikasturtetik aurrera, zonakako hamar sukalde jarriko dituzte martxan. Azaldu duenez, horietako bat Basaurin (Bizkaia) jarriko dute, eta inguruko bederatzi ikastetxetarako erabiliko dute. Ikasturte horretan bertan, halaber, hamabi sukalde eraikiko dituzte eskoletan. 2026-2027ko eta 2027-2028ko ikasturteetan ere hedatuko dira sukaldeak, «pixkanaka»: espero dute ikasturtero ikastetxeetan hamar sukalde ipintzea eta zonakako sei sukalde eraikitzea. «Horiek hezkuntza eta lurralde beharren arabera egingo dira».
%78Eskola jangela zenbat ikaslek erabiltzen duten, ehunekotan Begoña Pedrosak iragarri duenez, Lehen Hezkuntzako eskola publiko guztiek eskaintzen dute jangela zerbitzua, eta haurren %78k erabiltzen dute.
Gaur egun, egunero-egunero milaka umek eta gaztek jaten dute ikastetxeetako jangeletan. Pedrosak emandako datuaren arabera, Lehen Hezkuntzako eskola publiko guztiek eskaintzen dute zerbitzu hori, eta ikasleen %78k erabiltzen dute.
