Gasteizen etxegabetutako familia aterpetxe batean ari da lotan, eta kalean geratzeko arriskuan dago

Etxebizitza Sindikatu Sozialistak kontatu du gizarte zerbitzuek ez dietela alternatibarik eskaini, eta Gasteizko Udalaren «erabateko utzikeria» salatu du.

Gasteizko Udalari alternatiba bat eskatzeko pankarta bat, joan den ostiralean, Santsomendin hustu zuten etxeko balkoian. ENDIKA PORTILLO / FOKU
Gasteizko Udalari alternatiba bat eskatzeko pankarta bat, joan den ostiralean, Santsomendin hustu zuten etxeko balkoian. ENDIKA PORTILLO / FOKU
Paulo Ostolaza.
2026ko urriaren 26a
14:10
Entzun 00:00:00 00:00:00

Joan den ostiralean Gasteizko Santsomendi auzoan etxegabetu zuten familia etxerik gabekoentzako udal aterpetxean ari da lotan orduz geroztik. Ez dakite noiz arte, ordea. Gaur, Gasteizko Udalaren oinarrizko gizarte zerbitzuetara joan dira familia eta Etxebizitza Sindikatu Sozialistako kideak, eta jakinarazi dute ez dietela ezer eskaini, egonaldia hiru egunez berritzeaz gain. Epe hori amaitutakoan berriro joan beharko dute gizarte zerbitzuetara, egonaldia luzatzen jarraitu ote dezaketen jakiteko.

Sindikatuak «kalitatezko alternatiba iraunkorra» eskatu dio udalari. Izan ere, sei adingabez eta bi helduz osatutako familia hori edonoiz gera daiteke kalean, egonaldia luzatzen ez dietelako, edo larrialdiren bat edo bestelako egoeraren bat gertatuz gero kaleratu egin ditzaketelako aterpetxetik. Hala jakinarazi diete udaleko zerbitzuek.

Horren aurrean, sindikatuak Gasteizko Udalaren «erabateko utzikeria» salatu du: «Arazoa agerikoa da: familia horrek ezin du etxerik aurkitu merkatu librean, eta etxebizitza babestuak urriak dira edo ez dira eskaintzen». Gogorarazi dute 21 Zabalgunea udal erakundeak gutxienez hirurehun etxebizitza dituela hirian, eta horietako asko ez direla erabiltzen. 

«Azken urteetan, beti erantzun berbera eman dio udalak sindikatuari: ez dutela larrialdi egoeretarako etxebizitzarik. Baina, urte horietan guztietan, ez da neurri bakar bat ere hartu egoera konpontzeko. Kontrara, jabetza publikoko pisuak espekulatzaile handiei saldu zaizkie, Alde Zaharrean gertatu den bezala», amaitu du sindikatuak.

Kazetaritza etikoaren arabera sortua

Nola bermatzen dugun edukien kalitatea

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Zure babes ekonomikoari esker egiten dugu kazetaritza konprometitua. BABESTU BERRIA