Gizonezko batek 28 urteko emakumezko bat hil eta beste bat larri zauritu du ostiral iluntzean Sarrigurenen, Nafarroan. Hilketa 19:30ean gertatu da, Nafarroako Erreinua etorbideko etxebizitza batean; gizonezkoak labanaz eraso dio bere bikotekideari, eta, larrialdi zerbitzuak bertara joan badira ere, ezin izan dute emakumea suspertu. Gizonak larri zauritu du beste emakume bat, erasotzailearen beraren ama, eta Nafarroako Ospitale Unibertsitariora eraman dute.
Erasoaren ondoren, gizonak etxebizitzatik ihes egin du, baina Polizia telefonoz jarri da harekin harremanetan, eta geroago bere burua aurkeztu du polizia etxean, eta atxilo hartu dute. Foruzainak gertatutakoa ikertzen hasi dira. Auzia bere gain hartu duen epaileak sekretupean jarri du sumarioa.
Udaleko Bozeramaileen Batzordeak bilera bat egingo du larunbatean goizeko hamarretan, hilketa matxista gaitzesteko. Maria Txibite Nafarroako Gobernuko lehendakariak X sare sozialean zabaldutako mezu baten bidez arbuiatu du gertatutakoa: «Beste hilketa bat; bizitza kentzen dioten beste emakume bat, oraingoan Nafarroan. Hemen ez da arrakalarik egon behar. Nire gaitzespen irmoena; nire babesa bere familiarentzat». Javier Remirez Nafarroako Gobernuko presidenteorde eta Berdintasun kontseilariak, berriz, sare sozial berean idatzi du «inarrosita» dagoela hilketa matxistarengatik, eta gaineratu du gobernuak lan egingo duela «behin betiko matxismo kriminala gizartetik erauzteko». Itaiak mobilizaziora deitu du: larunbat honetan 11:30ean elkarretaratzea egingo dute Iruñeko Udaletxeko plazan.
Euskal Herrian aurten gertatu den lehenbiziko hilketa matxista da Sarrigurengoa; 2003az geroztik, 133 andre eta hamahiru haur hil dituzte gizonek, horietatik 25 Nafarroan. Azken hilketa matxista iazko abenduaren 21ean gertatu zen, Barakaldon (Bizkaia): gizonezko batek Josune M. D. hil zuen. 54 urte zituen. Iaz, zazpi emakume hil ziren indarkeria matxistaren eraginez. Gainera, 2024ko ekainaz geroztik desagertuta dago Laure Zuchello; Urruñan bizi zen, Lapurdin, eta haren bikotekidea atxilo hartu zuten.
