Steilas sindikatuak, ikasturte hasieraren harira, Eusko Jaurlaritzari egotzi dio «propagandarako makineria» martxan jartzea eta «titularretan eta iragarpen handietan» jartzea indarra, hezkuntza sistemak behar dituen sakoneko zenbait aldaketari erreparatu gabe. Prentsa ohar batean zabaldu du mezua sindikatuak, atzo ikasturte hasieraren harira Hezkuntza sailburu Begoña Pedrosak esan zituenei erantzuna emateko asmoz. Izan ere, Steilaseko kideen ustez, «gabeziak ezkutatzen eta asmo onak saltzen» segitzen du.
Hezkuntza Saileko ordezkariek, esaterako, sarri nabarmendu dute ikasturte honetan hizkuntza kudeatzaileak hasiko direla lanean ikastetxeetan, eta haien bidez beren hizkuntza planak garatu ahal izango dituztela eskolek, tokian tokiko premiei propio erreparatuta. Steilaseko ordezkariek gogora ekarri dute, ordea, gabezia ageriko bat ere izango dela ikasturte honetan: ez dira eskainiko Irale programaren bidez irakasleak euskararen eta euskal kulturaren inguruan trebatzeko egiten ziren murgiltze ikastaroak.
Hezi+ programa ere hizpide izan dute hezkuntza arduradunek, baina Steilaseko ordezkariek gogoratu dute ez dela guztiz berria; zehaztu dute lehendik ere bazela Hezi+ programaren «pareko» bat: Hedatze. Horrez gain, gogorarazi dute Hezi+ adostasunik gabe ezarriko dela, eta programa horren aurkako jarreraren atzean zer dagoen ere azaldu dute: «Lan akordioan ezarri zen ordu banaketa urratzen du».
