Datorren ikasturtean jarriko da abian, eta amaitutakoan ikasleek titulazio bikoitza lortuko dute. Eusko Jaurlaritzak iragarri du nazioarteko batxilergoa ezarriko duela hiru ikastetxe publikotan: zehazki, Bilboko Botikazar ikastetxean, Zornotzako Urritxen (Bizkaia) eta Gasteizko Unamunon. Orotara 81 ikaspostu eskainiko dituzte adar horretan, 27 ikastetxe bakoitzeko.
Begoña Pedrosa Hezkuntza sailburuak hiru institutuetako zuzendaritza taldeetako kideekin batera eman du horren berri. Pedrosaren esanetan, sare publikoan nazioarteko batxilergoa ezartzeak hezkuntza sistemaren nazioarteko proiekzioa indartzen du, eta ikasleen aukera akademikoak zabaldu.
Programa amaitzean, mundu osoko unibertsitate guztiek onartutako Nazioarteko Batxilergoko diploma lortuko dute ikasleek, batxilergoko titulu ofizialarekin batera.
Sei ikasgai multzotan egituratuta dago: Hizkuntza eta Literatura, Hizkuntzen Jabekuntza, Gizakia eta Gizartea, Zientzia, Matematika eta Artea. Gainera, hiru osagai komun izango ditu —Jarduera eta Zerbitzua, Monografia, eta Sormena—. Horietan Ezagutzaren Teoria jorratuko da, kasurako, «gogoeta kritikoa garatzea» helburu izango duen ikasgaia. Gainera, ikasleek bakarkako ikerketa lan akademiko bat egin beharko dute, baita sormenari, jarduera fisikoari eta gizarte konpromisoari lotutako proiektu bat ere.
Ebaluazioa «etengabea eta zorrotza» izango da. Kanpo probak egin beharko dira, eta irakasleek bi ikasturteetan egindako lanak eta proiektuak aztertuko dituzte. Sailburuaren esanetan, «balio erantsietako bat da aukera ematen duela pentsamendu, komunikazio, gizarte, autogestio eta ikerketa trebetasunen garapena barneratzeko».
Hiru ikastetxeetako zuzendaritzek nabarmendu dute programa hori eskaintzeko beharrezkoa dela konpromiso instituzionala, antolakuntza kaudimena eta profesionaltasun handia izatea. «Planifikazio zorrotza» egin beharko dute, eta metodologia «egokitu» ere bai; horregatik, «luzarorako apustua» izango da.
Gainera, irakasleek prestakuntza espezifikoa eta etengabea behar dute programa egoki aplikatzeko eta nazioarteko kalitate irizpideei eusten zaiela bermatzeko.
