«Euskaraz bizitzeko eta lan egiteko eskubidearen alde» manifestazioa antolatuta daukate ELAk, LABek eta Steilasek maiatzaren 9rako, Bilbon; gaur, Euskalgintzaren Kontseiluak bat egin du deialdiarekin, eta herritar guztiak deitu ditu bertan parte hartzera: «Euskarak eta euskal hiztun komunitateak bizi dugun larrialdi linguistikoa ikusirik, garrantzitsua da gizarte eremu guztietatik euskararen normalizazioaren aldeko ekarpena egitea eta indar hori kalean erakustea. Horrexegatik, herritar eta langileen hizkuntza eskubideen aldeko sindikatuen ekimena txalotzen dugu, eta gainerako eremuetako eragileei ere dei egiten diegu euskararen aldeko ekimenak antolatzera».
Euskal Enplegu Publikoaren Legea aldatzeko prozesua zabalik dago Eusko Legebiltzarrean, eta bi proposamen daude mahai gainean: EAJrena eta EH Bildurena. Gaur amaitu da zuzenketak aurkezteko epea. Testuinguru horretan dator sindikatuen manifestazioa. «Kontseiluak alderdi euskaltzaleei eskatzen die Legebiltzarrean aurrera eramaten ari den eztabaidaren emaitza izan dadila euskara eskakizuna gutxienez gaztelaniaren maila berean jartzea, eta erdietsi dezatela adostasun bat langile publiko guztiek euskararen ezagutza izango dutela bermatzeko».
Horretarako, zera eskatu du Euskalgintzaren Kontseiluak: euskaraz bizitzea posible egingo duen «arkitektura juridiko berri bat». Gainera, euskalgintzaren Kontseiluak nabarmendu du ekainaren 13an «euskaltzaletasunaren bilgune erraldoi» bihurtu nahi dutela Iruñea: Euskaraz bizitzeko behar den dena lelopean, mobilizazioa egingo dute. Hauexek eskaerak: euskara ofiziala izatea Euskal Herri osoan, «jauzi bat» ematea hizkuntza politiketan, eta euskaltzaletasuna aktibatzea. Euskaltzaleak bertan parte hartzera deitu dituzte.
