«Euskal hiztunen komunitatea eskubidez hornitzeak ez dio kalterik egiten gainontzeko herritarren egoerari». Hala mintzatu da Mertxe Aizpurua EH Bilduren Espainiako Kongresuko bozeramailea Eneko Andueza PSE-EEko idazkari nagusiak egindako azken adierazpenen harira. Are, Aizpuruak uste du «errealitatera egokitzen ez den dikotomia faltsu bat» ezarri nahi dutela eta Andueza «bulkada politiko bila» dabilela.
Izan ere, PSE-EEko idazkari nagusiak esan zuen EH Bilduk eta EAJk Euskal Enplegu Publikoaren Legeari lotuta egindako akordioa bloke eskuindarraren «lehentasun nazionalaren» parekoa zela. Radio Euskadiko Boulevard saioan, Aizpuruak argi utzi du zein den akordioaren xedea: euskal hiztunen komunitateak bizi duen egoerari erantzutea. «Agerikoa da euskal eta erdal hiztunen egoera ez dela bera», esan du. Haren hitzetan, akordioaren helburua ez da inor lehenestea, baizik eta herritar guztien eskubideak babestea.
EH Bilduko kideak esan duenez, espero du ez izatea unean uneko adostasun hutsa. Haren ustez, datozen urteetan gai estrategiko ugarik Euskal Herriaren etorkizuna baldintzatuko dute, eta gai horien inguruan akordioak herri ikuspegitik lortzea «ardura politikoaz jokatzea» da.
