EH Bilduko idazkari nagusi Arnaldo Otegik eskaera argi bat egin dio Eusko Jaurlaritzako lehendakari Imanol Pradalesi: alderdiei jakitera ematea zein den haren ikuspuntua, EAJ, EH Bildu eta PSE-EE eta PSOE negoziatzen ari diren estatus berriaren inguruan. Pradalesi eduki horren inguruan zer jarrera duen adierazteko esan dio, Euskadi Irratian egindako elkarrizketa batean.
Era berean, ez du «bidezkotzat» jo Pradalesek EH Bilduko idazkari nagusiaren aurkako kritika egitea estatus berriaren negoziazioen inguruan hark ustez izandako «diskrezio falta» dela eta. Otegik «erabakitzeko eskubide gradualari» buruz hitz egin du, eta Jaurlaritzako lehendakariak aurreko astean aurpegiratu zion beste modu batera jokatu behar dela diskrezioa babesteko.
Horiek horrela, Otegik uste du Pradales ez dela erakusten ari «lehendakariaren lidergoa» estatus berriaren edukian, eta «etengabe babesean» dagoela. Alderaketak egiten hasita, EH Bilduko buruak adierazi du negoziazio garrantzitsu hori txirrindularitza proba bat balitz, Pradales «tropelean» legokeela. «Liderra izan behar baduzu, ordea, tropelaren aurretik joan behar zara; bestela, tropeleko beste bat zara», azaldu du Otegik.
Dena den, argitu du alderdiak ari direla kudeatzen Gernikako Estatutua gaindituko lukeen beste adostasun bat lortzeko negoziazioak; «baina lehendakariak badu zeresana» autogobernuaren inguruan, koalizioko idazkari nagusiaren arabera: «Ez dut esaten publikoki aritu behar duela, baina posizio bat hartu behar du», erantsi du. Izan ere, Otegiren ustez, Pradalesek autogobernuari begira egin duen gauza bakarra zera da: «Estatutua bere osotasunean betetzeko eskatu; eta ez du lortu, zoritxarrez».
Erabakitzeko eskubidea
Gauzak horrela, Otegik plazaratu duen erabakitzeko eskubide gradaluaren kontzeptuari buruzko azalpen gehiago eman ditu. «Horrek esan nahi du Euskal Herrian gero eta erabaki gehiago hartzen joatea, dena erabakitzen den arte». Ziurtatu du «filosofia» horrekin joango direla Pradales lehendakariarekin egingo duten batzarrera, hastear den bilera sortaren barruan.
«Herri honetako prozesu garrantzitsu askotan parte hartu dut, su-etenetan edota Lizarra-Garazikoan, eta inork ezin du esan ni diskretoa izan ez naizenik»
ARNALDO OTEGI EH Bilduko idazkari nagusia
Pradalesek kargu hartu diola eta, «pazientzia eta diskrezioa» eskatuz, Otegik bere ibilbidearekin lotutako erantzuna eman du. «Nik hau esatea harropuzkeria dela pentsa dezake inork, baina denok dakigu herri honetako prozesu garrantzitsu askotan parte hartu dudala, su-etenetan edota Lizarra-Garazikoan, eta inork ezin du esan ni diskretua izan ez naizenik». Horregatik, Otegirentzat «ez da bidezkoa» Pradalesen kritika.
Estatus berriaren negoziazioei helduta, koalizio abertzaleko buruak esan du «urte batzuk» joan direla alderdiak gaiari buruz hizketan hasi zirenetik; «emaitzak ikusi egin beharko dira, emaitzak egonez gero; eta ez badaude, bakoitzak azaldu beharko du zein den bere iritzia. Baina esango nuke beti ekarriko dituela onurak herri honentzat, hiru familia politiko, diskrezioz eta fede onez, bi urtez hitz egiten egoteak».
Gobernu kolaboratiboak
Estatus berria alde batera utzita, ordea, EH Bilduko buruak ez du sumatzen EAJren jarreran koalizioarekin elkarlanean aritzeko, ezta testuingurua gero eta zailagoa den honetan, eskuin muturarren mehatsua dela eta. «Oso bitxia izan zen atzoko eguna: Markel Olanok esan zuen EH Bildurekin ezin zela akordiorik egin. Eta bitartean, beste bozeramaile batek esan zuen aurten EAJk guztiekin egingo dituela akordioak. Norbait dago leman?», galdetu du Otegik; eta ziurtatu du estrategia bat badagoela euskal politikan: «EH Bildurekin ezer ez».
Koalizio abertzaleko buruak urte du inoiz baino ageriago geratzen ari dela «gobernu kolaboratiboak» egiteko dagoen beharra. «Momentu historiko honetan, ez bakarrik autoritarismoa datorrelako, baizik eta sekulako erronka ditugulako industrian, trantsizio ekologikoan, inteligentzia artifizialean, migrazio politiketan.... gonbernu egin behar dira, baina batzuk, ordea, bazterketaren aldeko apustuan daude».
Otegik ziurtatu du Espainiako Estatua «krisi sakonean» dagoela. Ahoan bilorik gabe hitz egin du estatu kolpe bati buruz: «Eskuin muturra eta estatu aparatu asko daude estatu kolpe bigun bat ematen, eta prest daude Sanchez kartzelara eramateko». Eta kezka beteko hausnarketa bat partekatu du: «Sanchez kartzelara eramateko prest baldin badaude, ez dut pentsatu nahi beste batzuekin zer pentsatzen duten egitea».
Jarraian gehitu du, ordea, esperantzarako aukerak ere ikusten dituela: «Agertoki hau dator edo etorri daiteke. Nik ez dut uste partida galduta dagoenik oraindik, baina etortzen baldin bada, zer jarriko diogu aurrean sigla politiko batzuk edo herri bat? Herri bat jarri behar zaio parean, hori delako gure lehentasuna».
