Palestinaren aldeko protesta bat antolatu du Palestinarekin Elkartasuna plataformak iganderako, Gasteizen. Andre Maria Zuriaren plazatik abiatuko da manifestazioa, 13:00etan, eta Israelgo Estatua Gaza hirian egiten ari den inbasioa salatzea izango du helburu.
Plataformak salatu du joan den aste hasieraz geroztik Israelgo armadak Gazaren aurka abiatutako lurreko erasoa gobernu horren proiektu «genozida eta kolonialeko» beste urrats bat dela. Erasoaldi hori azken hamarkadetako okupazioaren eta «garbiketa etnikoaren» parte dela gogoratu du; nabarmendu duenez, bi urte dira genozidioa hasi zela, eta bederatzi hilabete inguru «planifikatutako blokeo humanitarioak» Palestinako herritarrei eragindako gosetea hasi zela.
Plataformak salatu duenez, «erakunde sionistak eragindako garbiketa etnikoa eta genozidioa» ez litzateke posible izango Mendebaldeko erakunde eta gobernuen laguntza eta konplizitaterik gabe. Salatu du Mendebaleko gobernuek, Palestinaren aldeko keinuak egin arren, Israelgo Gobernuarekin harreman ekonomiko, diplomatiko eta kulturalei eusten dietela, eta, aldi berean, Palestinaren alde protestan ari direnei «jazartzen» dietela eta «kriminalizatu» egiten dituztela.
Hori hala, Palestinarekin Elkartasuna plataformak uste du beharrezkoa dela mobilizatzen jarraitzea «erakunde sionistaren» eta hura sostengatzen duten gobernuen aurka eta Palestinako herriaren alde. Iganderako Gasteizen deitutako manifestazioan parte hartzera animatu ditu herritarrak.
