Joan den otsailean Iruñean egindako III. Kongresuaren ondoren, EH Bilduk aldaketak egin ditu barne egituran, eta horrek Eusko Legebiltzarreko taldeari ere eragin dio. Koalizioak jakinarazi duenez, Eraitz Saez de Egilaz arduratuko da aurrerantzean Gasteizko ganberako taldea koordinatzeaz; Oihana Etxebarrieta arduratu da lan horretaz orain arte.
Etxebarrietak, baina, beste ardura bat izango du aurrerantzean: Gorka Elejabarrietak zuzentzen duen EH Bilduren Harreman Politikoen Idazkaritzan arituko da. Eusko Legebiltzarrean duen eserlekuari eutsi egingo dio, hala ere.
Koalizio subiranistak nabarmendu du «belaunaldi berriek ardura garrantzitsuak bere gain hartzeko apustu irmoari» eusten diotela, eta horregatik eman diotela ardura hori Saez de Egilazi. 2020tik da legebiltzarkide Saez de Egilaz, eta gaur egun Mahaiko bigarren idazkaria ere bada.
