Unibertsitatean sartzeko hautaproban Euskara ikasgaian emaitza aski eskasak lortu zituzten joan den ikasturtean Araba, Bizkai eta Gipuzkoako hainbat ikaslek, protesta ozenak eragin zituen horrek, eta auzitara ere jo zuten hainbat pertsonak babes eske. Horren ondorioz, euskara ikasgaia aintzat ez hartzeko kautelazko neurriak eman zituzten hainbat auzitegik. EHU Euskal Herriko Unibertsitateak ebazpen horien kontra egin zuen, eta gaur ohar baten bidez jakinarazi du aldeko ebazpena jaso duela. Ondorioz, kautelazko neurri horiek bertan behera geratu dira.
«Justiziak babestu egin du EHUren jarrera unibertsitatera sartzeko probei buruzko auzian», jakitera eman du unibertsitateak. Eta jasotako aldeko ebazpenaren muina ere ezagutzera eman du: «Auzitegiak azpimarratu du behin-behineko ebazpen judizialek ezin dutela pribilegiozko egoerarik sortu gainerako ikasleekin alderatuta». Eta auzi honetan izan duten jarreraren defentsa irmoa egin du: «EHUk hasieratik defendatu du unibertsitatera sartzeko probak indarrean dagoen araudiaren arabera egin direla, eta ikasle guztiei irizpide berberak aplikatu behar zaizkiela».
Oharrean gogora ekarri du, baita ere, kautelazko neurriak indarrean egon diren bitartean horien araberako «neurri zehatzak» hartu direla ikasleen eskubideak ez urratzeko. Hain justu ere, beharrezkoa bazen ikasle gehiago hartzeko lekuak sortuko zirela esan zuten, eta konplitu egin dute hori. Azkenean leku gehigarri bat sortu behar izan dela esan dute. Onartu dute, hala ere, orain leku hori «kolokan» dagoela; izan ere, hura sortzea ahalbidetu zuen kautelazko neurria bertan behera dago orain.
