Gaurtik goiti, 250 metro kubiko edateko ur garraiatuko dituzte egunero Karrantzaraino, astelehenetik ostiralera. Bizkaiko Foru Aldundiak onartu du udalaren galdea, edateko ura bermatua izan dadin herrian. Momentuz adostu denez, hilabetez izanen dute zerbitzu berezitu hori; epea luzatu daiteke beharren arabera.
Hain zuzen ere, euri guti egin du azken asteetan, eta, erreserbak zinez murriztu zaizkie herrian. Orduan, oraingo idorte egoerak irauten duen bitartean, ura zisterna kamioietan eramanen dute Bilbo Bizkaia Ur Partzuergoaren instalazioetatik Karrantzako Udalaren biltegietara.
Aldundiak agiri bidez zehaztu duenez, San Estebango biltegia izanen da hornigaia jasotzeko puntu nagusia, eta, aldiro-aldiro, Karrantzako Udalak erabakiko du zertarako erabiliko den ura, erreserben egoeraren eta herria hornitzeko premien arabera.
Ekarriko duten urari kontrolak eginen dizkiote, segur izateko herritarrengana osasun berme guztiekin iritsiko dela.
Uda lehorra
Uda honetako euri eskasiaren ondorioz, Karrantza ez da herri bakarra zailtasunetan gertatzen dena edateko ur erreserbei dagokienez. Izan ere, hainbat udalerrik ur kontsumoa mugatzea gomendatu dute: hala gertatu da Busturialdean eta Zuian (Araba), adibidez.
Ipar Euskal Herrian, bestalde, Pirinio Atlantikoetako prefeturaren aginduz, ur kontsumoa zaindu beharrean dira herritarrak, edateko ura oinarrizko erabilerara mugatuz.
