Euskal selekzioak eta Palestinak futbol partida jokatuko dute azaroaren 15ean, San Mamesen. Baina ez da neurketa soil bat izango. Halaxe esan zuen Jibril Rajub Palestinako Futbol Federazioko lehendakariak: «Oroimenaren gune sakratu honetan hartzen du futbolak bere esanahirik handiena. Hau ez da trebetasun erakustaldi hutsa, futbolaren botere moralaren erakusgarria baizik». Bada, keinu solidario gehiago ere izango dira: Gure Esku, Gu Ere Bai eta Gernika-Palestina Deialdi Herritarra plataformek elkartasun martxarako deia egin dute, Herri Libreak. Euskal Herria-Palestina. Genozidioa Stop lelopean.
Bilboko Arriaga plazatik abiatuko da martxa, 17:30ean, eta San Mameseko Zabaldegian amaituko da. Palestinari elkartasuna erakutsi nahi diote, eta baita «bi herriei dagozkien kirol eta nazio eskubideak aldarrikatu ere, selekzioen ofizialtasuna barne». Eragileei ekimenarekin bat egiteko deia egin diete.
Duela astebete iragarri zuten partida solidarioa. Laster jarriko dituzte sarrerak salgai; antolatzaileek adierazi zutenez, partida baino hilabete lehenago jarriko dituzte, Euskadiko Futbol Federazioaren webgunean. Irabazi guztiak Palestinaren alde aritzen diren erakundeentzat izango dira.
