Martxoaren 1ean estreinatu zuen Primeran doako plataformak Linbo euskarazko saioaren bigarren denboraldia. Aitziber Gradosek (Altsasu, Nafarroa, 1999) aurkezten du programa hori. Lander Arretxea zuzendariak BERRIAn otsailaren 25ean adierazi zuen aurten gehiago ari direla Gradosentzat berarentzat saioa prestatzen, «beretik egin dezan saioa». Hiru Damatxo ekoiztetxeak EITBrentzat egiten duen late night show bat da Linbo, gazteek sortua eta gidatua. Bigarren denboraldiko sei atal ikus daitezke jada Primeran plataforman, eta EITBk erabaki du atal horiek telebista konbentzionalean ere ematea. Hortaz, ETB1 kateak gaurtik aurrera emango ditu bigarren denboraldiko atalak (22:15ean). Lehen atal horretako gonbidatuak Sune musikaria eta Bittor Kas influencer-a izan ziren.
Arretxeak eta Asier Kortabarriak zuzentzen duten taldea, edonola ere, atal gehiago grabatzen ari da. Igandero sareratuko dituzte, hortaz, atal berriak Primeran plataforman.
Aurreneko denboraldian, hasieratik eman zituzten saioak ETB1 katean, eta ondotik plataformetan jarri. Iazko apirilaren 24tik ekainaren 26ra iraun zuen lehen denboraldiak. Hamar atal emititu zituzten.
