Iragarri zuten otsailean zein izango zen hurrengo pausoa: mobilizazioak egitea. Bada, esan eta egin. Arabako, Bizkaiko eta Gipuzkoako ikuskizun eta ekitaldien sektoreko langileek grebarako deia egin dute, datorren maiatzaren 15erako, euren lan baldintzak hobetze aldera. Teknikariok, ESK, LAB, UGT, ELA eta CCOO sindikatuak batu dira deialdira. Otsailaren 23an egin zuten lehen agerraldia, sektorearen egoeraren berri emateko asmoz. Hainbat enpresa salatu zituzten Lan Ikuskaritzan, langileen ordezkarien informazio eskubidea urratzeagatik. Oraingoan, patronala negoziazio mahaian esertzea lortu nahi dute.
Erlazionatuta
Duela bi urte eratu zuten negoziazio mahaia, aipatutako sindikatuek eta EUKI patronalak —sektoreko enpresa gehienak biltzen ditu—. Sindikatuek ohar bidez azaldu dutenez, patronalak «blokeo sistematikoa» du ezarria: «2025eko uztailetik hona luzatu den immobilismo horrek benetako negoziazio bide oro agortu du; izan ere, ezinezkoa da langileen gutxieneko eskubideak zapaltzen dituzten proposamenekin akordioak lortzea». Haien ustez, patronalak lan baldintza duinak bermatzeko interes falta du.
Halaber, maiatzaren 15eko greba «mugarri» izango dela gaineratu dute sindikatuek. Jakitun daude sektoreak dituen berezitasunez, eta horien araberako neurriak nahi dituzte. Euren jarduna ekitaldi kulturaletan «beharrezkoa» dela argudiatu dute, eta deialdia aukera ona izango dela sektorea «itzalpetik» ateratzeko. «Sektore honetan urte asko daramatzagu prekaritatean murgilduta, normalizatzeraino ia. Kontzertu eta agerraldietatik bueltan makina bat aldiz kritikatu ditugun baldintza kaskarrak aldatzeko garaia iritsi da», adierazi dute prentsari bidalitako oharrean.
Laster emango dute mobilizazioen inguruko informazio gehiago.
