Joan den asteko asteazkenean Gasteizko udal gobernuak eta EH Bilduk iragarri zuten Amvisa agentziaren arreta zerbitzua publifikatuko zutela. Publifikazio hori, halere, urteetan bertan azpikontratatuta lanean aritu diren langileen subrogaziorik gabe onartu zuten. ELAk hori bera salatu du: «Zerbitzu hori duela urte askotatik ematen zuten sei langileak kaleratu egin dituzte, eta oraingoz ez dute lanpostu publiko berririk sortu, ezta langile berririk kontratatu ere, haiek egiten zuten lana egiteko». Langileek jakinarazi dute auzitara joko dutela.
Sindikatuak gaineratu du kaleratutako langileei ez dietela inongo kalte ordainik eman, eta salatu nahi izan du Amvisaren erantzukizuna: «Inongo kalte ordainketarik gabe kaleratu dituzte, orain arte zerbitzua eskaintzen zuen enpresak argudiatu baitu subrogazioa egin behar dela, baina Amvisak ez du erantzunik eman horren inguruan». Astelehen honetan bertan, azpikontratako langileei euren lanpostura sartzea ukatu zieten.
Era berean, ELAk gaur goizean jakinarazi du Tolosako eta Elgoibarko anbulantzia medikalizatuetako langileen subrogazioa lortu dutela, eta hori ekarri du gogora: «Beste erakundeetan zerbitzuak publifikatzen direnenean subrogazioa bermatzen bada, zergatik ez hemen?». Hori jakinik, ondorioztatu dute Gasteizko kasu honetan helburua ez zela zerbitzua publifikatzea, langile horiek kaleratzea baizik.
Hori guztia salatzeko, datorren asteartean, 12:00etan, manifestazioa egingo dute, Amvisaren egoitzan hasi, eta udaletxeraino.
