Frantzian bakarrik ez, Europako beste hamaika txokotan ere protestak izan dira azken egunetan. Italian, esaterako, manifestazioak egin dituzte asteburuan, bizitzaren garestitzea salatzeko. Modu baketsuan hasi ziren mobilizazioak, baina azkenerako istiluak izan ziren manifestarien eta Poliziaren artean; besteak beste, Milanen, Bolonian eta Turinen. Estatu indarrak manifestarien aurka oldartu ziren, eta negar gasa eta ur kanoiak erabili zituzten. Italiako ANSA albiste agentziak zabaldu duenez, 270 pertsona baino gehiago atxilotu zituzten, horietatik %80 adingabeak.
Egoera ikusita, Giorgia Meloni ultra buru duen gobernua aztertzen ari da zer neurri hartu. Besteak beste, beste ehunka militar hedatu nahi ditu kalean. EFE albiste agentziak Italiako Gobernuko iturriak aipatuz zabaldu duenez, Melonik bilerara deitu ditu ministroak gaur arratsalderako. Atzo ere Barne ministroarekin eta informazio zerbitzuetako buruekin bildu zen Erroman, eta Poliziaren proposamenak entzun zituzten.
Italiako presidenteorde eta Azpiegitura ministro Matteo Salvinik atzo gauean sare sozialetan jakinarazi zuen Milanen beste bostehun militar hedatuko dituztela hiria «defendatzeko». Salvinik hori idatzi aurretik, bere alderdiak — eskuin muturreko Legak— Kale seguruak izenez ezaguna den operazioa indartzeko proposamena egin zuen. Neurri hori 2008an jarri zuten indarrean, eta tentsio handiko guneetara militarrak bidaltzea du helburu, «kriminalitaterik izan ez dadin».
Horrekin lotuta, sare sozialetan Urriaren 17ko Mugimendua izeneko kontu bat sortu dute mobilizazioaren antolatzaileek, eta iragarri dute elkarretaratzeak egingo dituztela larunbatero, 15:00etan, «gobernua erorarazi arte». Gainera, Meloniri zuzenean erantzun diote txio batean: «Plazetan gaudenak gara. Biolentzia Poliziaren borretan ikusten dugunak. Zuek zarete indarkeria erabiltzen duzuenak, etorkizuna ukatu diguzue eta: berreskuratu egingo dugu»
Oposizioak ere Meloniren gobernuaren aurka egin du, eta leporatu dio arreta herrialdearen segurtasunean jartzea, herritarrak asaldatu dituzten arrazoi ekonomikoetan jarri beharrean. «Gobernuak neurriak hartzen al ditu prezioen igoerari aurre egiteko, edo kamioilarien, nekazarien, langileen edo ikasleen kexak entzuteko? Ez, noski. Segurtasunaren arloko neurriak baino ez ditu iragarri, ez baita gai izan ordena publikoari eusteko. Neurri ekonomikoak behar ditugu lehenbailehen», salatu du Giuseppe Conte M5S Bost Izar Mugimenduaren buruak.
Portugalen, grebara
Portugalen ere kalera jo dute gazteek. Astebete bete da Porton kanpaldiak antolatu zituztenetik etxebizitza eskubidea aldarrikatzeko, eta Lisboan ere gauza bera egin dute asteburuaz geroztik —egunero egiten dute bozketa bat kanpaldiarekin jarraitu edo ez erabakitzeko—.
Manifestariek, gainera, grebara jotzeko asmoa dute. Hain zuzen ere, azaroaren 11rako Espainian, Hego Euskal Herrian, Katalunian eta Galizian greba orokorrerako deia egina dagoenez, greba orokor iberiarra antolatzeko asmoa daukate. Horrela, helburua zera litzateke: geldialdia Iberiar penintsula osora hedatzea, mobilizazioak koordinatuta.
Portugalgo presidente Antonio Jose Segurok atzo kazetarien aurrean egindako agerraldi batean adierazi zuen beharrezkoa dela «hainbat alderdiren arteko akordio bat» egitea «premiazko neurri iraunkorrak» hartzeko herrialdeko etxebizitza krisiaren kontra. Azaldu zuenez, «hainbat» alderdik aurkeztu dituzte auzi horri aurre egiteko ekinaldiak, eta gobernuak ere beste horrenbeste egin du, haren esanetan. «Orain aurrerapauso bat eman behar dugu: proposamenak entzun, eta neurriak hartu; batzuk iraunkorrak eta besteak premiazkoak».
