Goizean goiz heldu da deliberoa: Europako Batasunak mailegua emango dio Ukrainari, bai, baina ez espero zen moduan. Talde komunitarioak eurobonuen bidez finantzatuko ditu 90.000 milioi euro, eta ez Errusiari blokeatutako aktiboen irabazien bidez. «Konprometitu egin ginen, eta esandakoa bete dugu», iragarri die Antonio Costa Europar Kontseiluko presidenteak kazetariei. Baldin eta Errusiak ez baditu ordaintzen inbasioaren kalteak, aktiboak erabiltzeko aukeraz eztabaidatuko dute berriro, EBko estatuek blindatuta baitituzte aktibo horiek; Costak adierazi du horretarako «eskubidea» gordeko dutela.
EBko gobernuburuek eta estatuburuek goi bilera hasi zuten atzo Bruselan, gaur ere biltzekoak dira. Aho batez hartu behar izan dute erabakia, nahiz eta bazeuden Ukrainari laguntzeko asmorik ez zutenik: Hungaria, Eslovakia eta Txekia. Bada, bozketa ez zapuztearen truke, herrialde horiek ez dituzte beren gain hartu beharko maileguaren obligazioak, eta taldeko gainontzeko 24 estatuek finantzatu beharko dute. Viktor Orban Hungariako lehen ministroak jakinarazi du «zama» kendu dutela gainetik, eta erabaki «zeharo txarra» dela: «Mailegua dirudi, baina, noski, ukrainarrek ezingo dute inoiz ordaindu, eta, beraz, dirua xahutu dute».
Taldeko herrialdeek duela hiru urte blokeatu zizkioten Errusiari 210.000 milioi euroren aktiboak, Ukrainako inbasioari ekin zionean. Eta, puska handiena Belgikako Euroclear finantza finantza enpresan daude, 180.000 milioi baino gehiago; hain zuzen ere, herrialde horrek muzin egin dio aktiboak erabiltzeko aukerari, argudiatuta Errusiak haren kontrako neurriak hartu zitezkeela, EBk bermeak eskaini dizkion arren. Bart De Wever Belgikako lehen ministroak prentsaurrekoa egin du goizaldean, eta argi utzi du negoziazio korapilatsua izan dela gaur artekoa: «Hari solte asko zeuden, eta behin horiei tiraka hasita, ezin ziren askatu». Hori bai, Costak esandakoa errepikatu du; alegia, Moskuk Kievi zor diona ordaindu ezean ez dela matazarik egongo: «Azken instantzian, Errusiak arrazoigabeko gerrarekin eragin dituen kalteak erreparatzeko erabiliko dira».
Errusiaren aktiboen proposamenak aurrea egin ez duen arren, antzerako baldintzak eskaini dizkiote Ukrainari. Datozen bi urteetarako behar duenaren bi heren pagatu ahalko ditu, aurreikusten baita tarte horretan 135.000 milioi euro beharko dituela armadari eta herrialdearen funtzionamenduari eusteko, eta ez du dirua itzuli beharko Errusiak inbasioaren kalteak ordaindu arte. Izan ere, EB fio da, edo espero du, behintzat, Errusia noiz edo noiz prest egongo dela dirutza hori ordaintzeko: Volodimir Zelenski Ukrainako presidentearen arabera, herrialdeak 600.000 milioi euro baino gehiago behar ditu inbasioaz geroztiko kalteei eta beharrei erantzuteko.
