Inkestei jaramonik ez egiteko aholkatu izan du Abelardo de la Espriella (Aberriaren Defendatzaileak) ultraeskuineko hautagaiak Kolonbiako presidentetzarako bozen kanpainan zehar. Zundaketek faborito argitzat zuten Ivan Cepeda (Itun Historikoa) ezkerreko hautagaia, baina atzo egindako lehen itzulian ezin izan zuen hautagai ultra garaitu. De la Espriellak botoen %43,74 lortu ditu, eta Cepedak, %40,9. Hautagai batek ere ez duenez botoen erdia baino gehiago eskuratu, bi bozkatuenek bigarren itzulia lehiatuko dute ekainaren 21ean. Paloma Valencia (Zentro Demokratikoa) uribista izan da galtzaile nagusia; botoen %6,9 lortuta, eskuinekoa urrun geratu da beste bi hautagai nagusiekiko. Bigarren itzulian De la Espriellaren alde egingo duela esan du.
Lehen emaitzen berri izan eta segituan, Gustavo Petro presidenteak X sare sozialean idatzi du ez dituela emaitza horiek onartuko. Cepedaren alderdikidearen arabera, botoen lehen zenbaketak —enpresa pribatu batek egina da— ez du sinesgarritasunik, eta gaineratu du emaitzak ofizialak argitaratu arte itxaron behar dela. Inolako frogarik eman gabe, presidenteak salatu du lehen zenbaketako erroldan 800.000 herritar gehiago ageri direla errolda ofizialean baino.
Cepedak bart Bogotan emandako hitzaldian adierazi du ez duela emaitzen baloraziorik egingo «azken botoa berrikusi arte». Lehen zenbaketak ez dira ofizialak, eta hainbat egun igaroko dira botoen zenbaketa ofiziala amaitu arte. Hala ere, kontuan hartu behar da emaitza ofizialen eta lehen zenbaketen artean ez dela alde handirik egoten.
Cepedaren eta Petroren aurka egin du De la Espriellak emaitzen berri izan ostean emandako hitzaldian. «Petro eta Cepeda, gaizkile parea, ez zaitezte ausartu herritarren nahiari kontra egitera; hemen aurre egin dizuen herri bat dago, eta garaitu egingo zaituztegu», adierazi du Barranquilla hirian egindako agerraldian. Kristal blindatuz babestuta egin du agerraldia hautagai ultraeskuindarrak, Kolonbiako futbol selekzioko elastikoa soinean. Bozen kanpainan ere kristal blindatuaren babespean aritu da hitzaldiak ematen, bere esanetan, heriotza mehatxuak jaso baititu.
Herrialdean segurtasun gabezia dagoela bistaratu nahian aritu izan da De la Espriella. Izan ere, segurtasuna hartu du ardatz bozen kanpainarako. Petroren gobernuak abian jarritako Bake Osoa kritikatu du, eta adierazi gogor egin behar dela «talde kriminalen» aurka. Nayib Bukele El Salvadorko presidentearen eredua hartu du eredutzat; eta prest agertu da ekintza militarrak ugaritzeko eta kartzela erraldoiak eraikitzeko. Halere, esana du bera Bukele baino gogorragoa dela, El Salvadorko presidentea «eskaut» bat dela bere aldean.
Ezkerrak presidentetzarako bozen lehen itzulian inoiz lortutako emaitzarik onenak eskuratu ditu gaur, baina ez dute ospakizun handirik egin. Bogotan elkartu dira Itun Historikoa alderdiko kideak, eta bigarren itzulian hautagai ultraeskuindarra garaitzeko esperantzarekin agertu dira. «Ez dira pasako!», aldarrikatu dute Tequendama hotelean bildu diren alderdikideek. Petrok duela lau urte baino emaitza hobeak lortu ditu Cepedak: ia 9,7 milioi boto, 2022an baino milioi bat gehiago. Baina eskuin muturreko hautagaiaren garaipenak —10,3 milioi boto— itzala egin die ezkerraren emaitzei.
