ERREZETA
Aza hostoak, barazkiz beteta
OSAGAIAK
4 LAGUNENTZAT
Aza.
Piper gorria.
Piper berdea.
Tipula.
Baratxuria (lau ale).
Shiitake perretxikoak (200 gramo).
Soja saltsa.
Oliba olioa.
Gatza.
Piper hauts beltza.
1. Lehenik eta behin, piper gorria, berdea eta tipula juliana erara moztu. Hori guztia erregosten jarri lapiko batean, su ertainean, 15 minutuz, oliba-olio txorrotada batekin eta gatz pitin batekin.
2. Baratxuri aleak zuritu, eta xafla finetan moztu. Shiitake perretxikoak juliana erara moztu. Bi osagai horiek zartagin batean erregosi, su bizian, bost bat minutuz. Sua itzali eta soja saltsaren txorrotada on bat gehitu.
3. Zartagineko osagaiak lapikora gehitu, eta sua itzali.
4. Azari banan-banan hostoak osorik kendu. Uretatik pasatu, garbitzeko. Lapiko batean, ura irakiten jarri gatz pitin batekin, eta aza hostoak bertan egosi, lau bat minutuz. Atera, eta segidan ur hotzetatik pasatu, ondo hozteko. Ur soberakina kendu, ahal den neurrian.
5. Mahaian hosto guztiak zabaldu. Koilarakada bat barazki eta shiitake banatu hosto bakoitzaren erdian. Txinatar bilkari baten modura bildu, eta bi aukera izango ditugu azken ukitua emateko: zartagin batean frijitu, olio txorrotada batekin, bi aldeetatik. Edo labeko erretilu batean denak bata bestearen ondoan jarri, eta labe oso beroan sartu bost edo hamar minutuz.
6. Horrenbestez, prest izango ditugu barazkiz eta shiitakez betetako aza hosto goxoak, dastatzeko. Shiitake perretxikorik ez badugu, onddoak edo barrengorriak ere erabil ditzakegu.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
