4 LAGUNENTZAT
Hogei pikillo piper.
200 gramo perretxiko.
Oliba olio birjina.
Gurina .
Lau koilarakada irin.
750 mililitro baserriko esne.
Esne gaina.
Gatza.
Saltsa egiteko: pikillo piper hautsiak.
1. Errezeta hau bi zatitan egingo dugu, bi egunetan. Hasteko, bexamela egin behar da. Jarri lapiko batean berotzen olio txorrotada bat eta gurin koilarakada bat. Gehitu lau koilarakada irin, eta ondo nahastu. Pixka bat egosten eduki eta gero, poliki-poliki esnea gehituz joan, guztia bukatu arte —esnea aldez aurretik beroa baldin badago, hobeto—. Gatz pitin bat bota, guztia ondo nahastu, eta bexamel krematsua lortuko dugu.
2. Moztu perretxikoak karratu txikietan, eta su bizian erregosi zartagin batean, olio pixka batekin, hiru edo lau minutuan. Ondoren, perretxikoei olioa ongi kendu, eta gehitu bexamel kremara. Gorde bexamela.
3. Hurrengo egunean, hartu gordetako pikillo piperrak, eta banan-banan bete, koilaratxo baten laguntzaz, perretxiko bexamelez. Jarri guztiak labeko erretilu batean, bata bestearen ondoan, eta bota oliba-olio txorrotada fin bat gainetik. Jarri labea berotzen 160 graduan, eta, beroa dagoenean, sartu piperren erretilua. Bost edo zazpi minutu inguru eduki labean.
4. Bitartean, piper krema bat prestatuko dugu. Horretarako, jarri olio txorrotada bat lapiko batean, eta, beroa dagoenean, gehitu pikillo piper hautsiak. Ondoren, gehitu edalontzi bat esne gain, eta guztia irakiten eduki lau bat minutu. Irabiagailu elektrikoarekin txikitu, eta pikillo piperren krema lortuko dugu.
5. Bukatzeko, atera piperrak labetik, banatu plateretan, eta ongi busti piper kremarekin.
