Iker Markinezek legatza eta otarrainxkak oinarri hartuta prestatu du aste honetako errezeta.
Porruak, 400 g garbi Tipula handi bat Etxean egindako tomatea, koilarakada bat Arrautzak, 12 Esne gaina, litro bat Legatza, 500 g garbi Otarrainxkak, 12 Gurina Gatza Piper hauts beltza Maionesa
Lehenik, barazkiekin hasiko gara. Porruak ondo garbitu ondoren, karratu txikietan moztu. Tipularekin ere gauza berbera egingo dugu. Lapiko batean gurin puska on bat jarri, eta barazki horiek errogosten hasi, ahalik eta surik motelenean. Zartagina taparekin estaliko dugu. Pauso hori oso garrantzitsua da, ez baita komeni barazkiek kolore gehiegi hartzea.
Barazkiak erregosten ditugun bitartean, legatza karratutxoetan moztu eta gatza eta piper hautsa gehitu. Barazkiak erregosi ditugunean, legatz puskak bertara bota. Oraingoan, taparik ez dugu erabiliko, eta bost minutuz su motelean erregosi dena. Ez da komeni legatzak kolorerik hartzea.
Sua itzali, eta tomate saltsa basokada bat bota bertara; esne gain guztia eta arrautzak ere bota. Turmix-aren laguntzarekin guztia irabiatuko dugu; ez da beharrezkoa dena erabat irabiatzea, gorputz pixka batekin uztea komeni baita. Gatz nahikoa daukan edo ez jakiteko, probatu, eta pixka bat gehiago bota, behar izanez gero. Hauxe da momentua piper hauts beltza botatzeko ere.
Laberako molde laukiluzeak hartu, bizkotxoak egiteko erabiltzen direnak, eta gurinarekin moldearen paretak igurtzi. Labea berotzen jarri, 160 gradutan. Berotuta dagoenean, moldeak pastel masaz bete, eta erretilu batean laberatu, eta marian berotu. Moldeak 55 bat minutuz eduki bertan. Denbora pasatu ondoren, labana baten laguntzarekin proba egin ea labetik moldeak atera ditzakegun ikusteko. Horretarako, labanaren punta masan sartu eta erabat garbi ateratzen dela ziurtatu. Horrela bada, atera ditzakegu labetik; bestela, minutu batzuk gehiago mantendu labean.
Budina edo pastela hozten ari den bitartean, otarrainxkekin hasiko gara lanean. Horiek erabat zuritu, eta burua ere kendu. Lapiko batean ura ipini, gatz pitin batekin. Irakiten hastean, otarrainxka gorputzak hara bota, eta adi, minutu bat pasatu ondoren, atera.
Pastelak jada hoztuta daudenean, moldeetatik atera eta xaflatan moztu. Platereratzeko garaian, xaflak plateren erdian kokatu, pastel pusken gainean maionesa bota, eta, azkenik, otarrainxka egosiak kokatu.
Gaurko errezetak nire hasierako urteetako garaietara narama. Juan Mari Arzak sukaldariak hain famatua egin zuen krabarroka pastela dauka oinarrian. Frantziatik datorren kozinatzeko eredua da, eta gainontzeko sukaldaritzetan ere etengabe saiatu ginen 80ko hamarkadan sortutako plater horren kopia egiten. Eta bai jatetxeetan eta bai etxeetan, legatz pastela Gabonetako eta ospakizun garrantzitsuetako jaki nagusi bihurtu zen, dudarik gabe. Azken urteotan gutxiago ikusten da plater hori, eta, keinu txiki bat egin nahi izan diogu guk, jendea errezeta erraz hau egitera animatu dadin.
