Iker Markinezek antxoak, barazkiak eta patatak erabili ditu aste honetako errezeta egiteko.
Rostia egiteko: Patata egosiak, lau Gatza Piper hauts beltza Gurina Ondoren: Antxoak, 800 g Tipula bat Azenario bat Lekak, 200 g Piper gorri morroi bat Oliba olioa Gatza
Rostia prestatzen hasteko, lehenik eta behin patatak egosiko ditugu azal eta guzti: lapiko batean ura jarri, eta 40 bat minutuz irakin. Tamainaren arabera, beharbada, denbora aldatu egingo da pixka bat. Gero, patatak atera eta hozten utzi plater batean.
Patatak hozten diren bitartean, barazkien prestaketa pixka bat aurreratuko dugu. Barazkiak garbitu eta azenarioak zuritu. Leken txortenak ere kendu. Juliana moduan moztu denak, tamaina berean; ahal bada, ez oso zerrenda finetan, barazkiek presentzia izan dezaten.
Zartagin zabal bat hartu, oliba olio txorrotada bat bota, eta barazkien erdiak, gutxi gorabehera, zartaginera bota. Gatz pitin bat gehitu, eta su bizian erregosi, bost bat minutuz. Erretilu batera atera, eta beste hainbeste egin falta diren barazkiekin. Oso komenigarria da barazkiak bi multzotan erregostea, helburua baita barazki horiek wok moduan prestatzea.
Egositako patatak zuritu, eta birringailu baten laguntzarekin guztiak birrindu, ontzi batean. Gatza gehitu, eta piper hauts beltza ere bai. Zartagin itsasgaitza bat sutan jarri, surik piztu gabe. Koilarakada on bat gurin gehitu, eta su ertainean berotzen jarri. Gurina urtu bezain laster, patata birrindua dugun erretilura bota. Sardexka batekin guztia ondo nahastu, eta zartagina berriz sutan jarri; horra bota patatak. Orain, patata txukun-txukun zapaltzen joan, talo moduko bat lortu arte. Gurin puskatxo batzuk hartu, eta, eskuarekin, zartaginean patataren inguruan gehitu. Patata taloari gorritasun pittin bat emango dio horrek. Lau bat minutuz eduki, eta tortilla baten moduan buelta eman. Aurreko pauso berak errepikatu. Gero, atera.
Antxoak garbituta erosi ditugu gaur; hezurra kendu. Zartagin zabal bat hartu, eta bertan frijituko ditugu, plantxa moduan. Oliba olio oso gutxirekin eta su oso bizian frijitu. Garrantzitsua da zartagineko antxoa kantitatea txikia izatea. Multzo txikietan hobeto frijituko dira. Guztiak frijituta dauzkagunean, banan-banan bakoitzari isatsa kendu; horrela, antxoa bakoitza bi xolomotan izango dugu.
Azkenik, platera osatzeko, rostia erdian ipini, horren gainean barazkiak kokatu, eta barazkiak, txondorra balira bezala, antxoekin estaliko ditugu.
Rostia, jatorriz, ez da gure herrialdeko platera, baizik eta Suitzakoa, oso ezaguna. Lehen begiratuan, patata tortillaren tankera hartuko diogu; horixe pentsatu nuen nik ere jan nuen lehen aldian. Haiek lagungarri moduan erabiltzen dute, haragi, saltsa eta abarrekin batera. Guk gaur arrainarekin aprobetxatuko dugu. Horrela, gaurko platera ere erabat osoa izan dadin lortuko dugu, otordu bateko osagai guztiak dituena.
