ERREZETA
Oilasko bular frijituak Tuterako kukuluekin
OSAGAIAK
4 LAGUNENTZAT
Oilasko bularra: 400 gramo.
Tuterako sei kukulu.
Entsaladarako tomate bat.
Ahuakate bat.
Patata egosi bat.
Oliba olioa.
Gatza.
Ezpeletako piper hautsa.
Modenako ozpina.
1. Hasteko, moztu oilaskoaren bular xerrak kubo txikietan. Jarri ontzi batean, bota gatz pittin bat, eta baita Ezpeletako piper hautsa eta oliba olio tanta batzuk ere. Sartu hozkailuan, eta han eduki hamabi bat orduan.
2. Moztu tomatea aurrena xafla lodietan, eta gero kubo txikietan. Bota erretilu batera. Gauza bera egin patata egosiarekin eta ahuakatearekin. Gehitu Modenako ozpina eta oliba olio txorrotada bat. Gorde.
3. Moztu erditik Tuterako kukuluak. Jarri plater batean, eta bota gatza, ozpina eta olioa.
4. Ongi berotu zartagina, eta hartan frijitu oilasko bularrak, su bizian, hiru edo lau bat minutuz. Itzali sua, eta bertan utzi.
5. Zabaldu ahuakatea eta patata kukuluen gainean. Bukatzeko, zabaldu zartaginean dauden oilasko bular zatiak ere. Platera prest dago dastatzeko.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
