Txerri azpizuna shitake eta barazkiekin

OSAGAIAK
Txerri azpizun 1.
4 shitake handi.
Dozena bat gari zainzuri.
2 azenario.
4 zerbaren orrimami.
Gatza.
Piper beltz hautsa.
Oliba olio birjina.

1. Lehenik, barazkien prestaketarekin hasiko gara. Horretarako, azenarioak zuritu, eta makilatxo fin eta luzeetan moztu. Zerba orrimamiei iletxoak kendu, eta horiek ere makila luze forman moztu. Gari zainzuriak erditik moztu; errezeta honetarako, buru aldea bakarrik erabiliko dugu (zurtoin zatia, beraz, beste baterako gordeko dugu).
2. Lapiko batean, ura irakiten jarri, gatz pittin batekin. Irakiten hastean, lehenik, azenarioa gehitu, eta bost minutuz egosi. Ondoren, ur hotzetara pasatu, eta gorde. Gauza berbera egin zerbaren orrimamiekin; horiek bost minutuz egosi, eta gero, ur hotzetan hoztu. Azkenik, gari zainzuriak: horiek hiru edo lau minutuz egosi, hoztu, eta gorde.
3. Jarraian, txerri azpizuna behatz baten lodierako xerratan moztu. Plater batean ipini, eta gatz eta piper beltz hautsa ere gehitu, bi aldeetatik.
4. Zartagin zabal bat berotzen jarri, eta ondo beroa dagoenean, azpizun xerrak jarri, bata bestearen ondoan, baina zartagin osoa okupatu gabe. Oliba olio txorrota bat bota. Zartaginean libre utzi dugun leku horretan, shitake txapelak jarriko ditugu, behera begira. Bi minutu pasatu ondoren, txerri azpizunari buelta eman; shitakeak utzi dauden bezala, zartaginean. Beste pare bat minutu pasatu ondoren, erretilu batera atera txerri azpizun xerrak, bakarrik. Shitakeei buelta eman, eta bertara egosita ditugun barazki guztiak gehitu. Guztia pare bat minutuz erregosi; sua itzali, eta oliba olio txorrota txiki bat gehitu.
5. Plateretara zerbitzatzea besterik ez zaigu gelditzen: shitakea plater erdian jarri, eta gainean, pare bat txerri azpizun xerra, eta inguruan barazkiak. Oso goxoa gelditu zaigu horrela, baina nahi baduzue haragi saltsa batez ere lagundu dezakezue.