ERREZETA
Untxia piperradarekin eta curry ukituarekin
OSAGAIAK 4 LAGUNENTZAT
Untxi bat.
Tipulina.
3 piper berde.
Piper gorri 1.
2 baratxuri ale.
Gatza.
Oliba olioa.
Currya.
Oharra: errezeta hau bi egunean prestatzen da.
1. Hasteko, zatitu untxia laban batekin.
2. Jarri untxi zatiak ontzi batean. Bota bertara currya eta oliba olio zurrusta bat. Nahastu dena ongi eskuekin. Estali ontzia film gardenarekin eta sartu hozkailuan. Egun oso bat egin beharko du bertan.
3. Hurrengo egunean, ipini untxi zatiak labeko erretilu batean, eta bota ur pixka bat, labean erretzen denean hezetasun apur bat izan dezan. Jarri labea berotzen, 180 gradutan, eta, tenperatura lortutakoan, sartu untxia. Eduki labean hogei minutuan.
4. Untxia egiten den bitartean, jarri berotzen zartagin zabal bat, olio zurrusta batekin. Moztu tipula eta piper berdeak eta gorriak juliana moduan, eta erregosi su bizian, kolore pixka bat har dezaten. Bota gatz pittin bat ere. Hogei bat minutu eta gero, kendu sutatik, eta gorde.
5. Untxia labetik ateratakoan, eman buelta zatiei, eta sartu berriro labean, beste hogei minutuz. Oraingo honetan ere gehitu oliba olio zurrusta txiki bat, eta baita baratxuri xehatua ere.
6. Azkenik, atera labeko erretilua eta gehitu zartagineko piperrada. Nahastu guztia ongi, horrela piperradak untxiaren zapore guztia hartzeko. Zerbitzatzea besterik ez da gelditzen: banatu untxi pusketan plateretan, eta jarri piperrada untxi zatien aldamenean.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
