Kantauri itsasoko antxoa piperradarekin

OSAGAIAK
4 LAGUNENTZAT

Kilo bat antxoa.
Pipermorro gorri bat.
Bi piper berde.
Tipula handi bat.
Hiru baratxuri ale.
Ezpeletako piperrautsa.
Gatza.
Oliba olioa.

1. Antxoa guztiak garbitu, eta bi xerratan ireki. Antxoa xerrei kendu, ahalik eta ondoena, barnean dituzten hezurtxoak. Baita bizkarraldean izaten dutena ere. Guztiak garbitutakoan, gorde.

2. Barazkiak garbitu, eta juliana eran moztu. Bota olio txorrotada bat zartagin batera, eta erregosi barazkiak, su ertainean, hiru edo lau minutuz. Barazkiak nahastu, eta beste hamabost bat minutuan eduki sutan, berriz ere su ertainean.

3. Baratxuriak zuritu, eta aleak xerra finetan moztu. Zartagin zabal batean gorritu baratxuri xaflatxoak oliba olio pixka batekin, eta, jarraian, gehitu baratxuriak piperrada daukagun zartaginera.

4. Baratxuria egiteko erabilitako zartagin bera su bizian jarri, bota olio pittin bat, eta frijitu antxoak plantxan (frijitu aurretik gatza bota behar zaiei antxoei). Aldi bakoitzean ez jarri antxoa asko zartaginean, zortzi bat gehienez, bestela zartaginak indarra galduko baitu eta antxoak itsatsita geldituko baitira. Frijitu antxoa guztiak, txandaka.

5. Bukatzeko, plater bakoitzean jarri barazki batzuk eta, piperradaren bueltan, antxoak. Gehitu Ezpeletako piperrauts pittin bat, bai eta oliba olio txorrotada txiki bat ere. Sasoian dugun arrain preziatua jateko era koloretsua eta goxoa da.