Iker Markinezek onddoak eta krepeak oinarri hartuta prestatu du aste honetako errezeta.
Krepeak egiteko: Hiru arrautza Irina, 100 g Gurina, 40 g Gatza Esnea, litro laurdena Martxoko ezkoak, 500 g Oliba olio birjina Gurina Tipula bat Lau koilarakada irin Baserriko esnea, hiru litro laurden Gatza
Gaur, garai honetako perretxiko bat erabiliko dugu errezetako osagai berezi moduan: martxoko ezkoa edo neguko ziza. Izan ere, garai honetan ateratzen da gure mendi eta inguruetan, hotzarekin batera. Hala ere, perretxikoen munduan komeni den bezala, perretxikoak ondo ezagutu behar dira biltzen hasi eta jan aurretik. Aurrez, gai horri buruz dakien norbaitekin hitz egin beti.
Krepeak prestatzeko, nahastu osagai hauek ontzi batean: arrautzak osorik, gatz pitin bat eta irina. Dena ondo irabiatu ondoren, gehitu esnea eta nahastu. Hartu zartagin ertain bat, bota gurin puska bat, eta berotzen jarri. Gurina urtzean, bota krepearen masara, eta zartagina berriro sutan jarri. Krepearen masa ondo nahastu berriro, eta hasi krepeak egiten. Burruntzali txiki baten laguntzarekin, bota krepeen masa zartaginera. Mugitu zartagina alde batetik bestera, dena ondo zabaldu arte. Segundo gutxi batzuen buruan, eman buelta krepeei eskuekin, eta, jarraian, atera plater batera. Egin urrats horiek berak masa guztia bukatu arte.
Hurrengo pausoan, martxoko ezkoak prestatuko ditugu. Zuritu tipula, moztu puska txikietan, eta erregosten jarri oliba-olio txorrotada batekin. Bitartean, ondo garbitu perretxikoak, eta moztu juliana modura. Ez moztu oso zerrenda finetan, jateko garaian perretxikoa nabaritu dadin. Hiruzpalau minutuz sutan eduki ondoren, itzali sua, eta gorde egindakoa.
Bexamela prestatzeko, jarri lapiko bat berotzen, olio txorrotada batekin eta gurin koilarakada batekin. Gehitu lau koilarakada irin, nahastu, eta, pixka bat egosten eduki ondoren, bota esnea poliki-poliki, guztia bukatu arte —esnea aurrez berotuta badago, hobeto—. Bota gatz pitin bat, eta ondo nahastu. Bexamel krematsu bat sortuko da horrela. Bota zartagineko perretxikoak bexamela dagoen ontzira, irakinarazi pare bat minutuz, eta gero hozten utzi.
Bexamela ondo hoztuta dagoenean, hasi krepeak betetzen. Horretarako, ondo zabaldu krepeak, eta bota perretxiko bexamelaren pare bat koilarakada erdian. Ondoren, tolestu krepea bi aldiz. Jarraitu pauso berberei krepe guztiak bete arte. Azkenik, zerbitzatu aurretik, sartu labean, bero-bero atera daitezen.
Lagungarri moduan, edozein saltsa balia daiteke, baina pikillo saltsa erabiliko dugu gaur.
