OSAGAIAK
4 pertsonarentzako osagaiak:6 Tuterako kukulu
6 txipiroi fresko
Brie gazta zati bat
Tipulina sorta bat
Oliba olio birjina
Sagardo ozpina
Modena ozpina
Gatza
• Lehenik, txipiroiak garbituko ditugu, eta ondoren, gorde. Gero, tipulinak puxka txikietan moztu; zartagin batean, oliba olio zorrotada batekin, su ertainean 15 minutuz erregosi.
• Ondoren, sutik atera eta katilu batean gorde. Brie gazta, behi gazta da, baina Frantziakoa. Gazta hori pare bat zentimetroko xaflatan moztu.
• Ondoren, ozpin-olioa prestatuko dugu. Horretarako,ontzi batean jarri sagardo ozpin koilarakada bat, eta modena ozpin beste koilarakada bat. 6 koilarakada oliba olio gehitu, eta gatz pitin bat ere bai. Guztia ongi nahastu.
• Tuterako kukulu bakoitza lau pusketatan moztu, eta erretilu batean kokatu. Gatz pitin bat bota kukulu bakoitzari. Txipiroiak hartu, eta banan-banan erditik moztu. Zartagin zabal bat berotzen jarri, eta bertan txipiroiak frijituko ditugu.
• Txipiroiak frijituak ditugunean, aurrez prestaturik dugun tipulina gainetik bota eta sua itzali. Brie gazta kukuluen gainetik zabaldu eta gainetik txipiroi beroak zalbadu.
• Bukatzeko, ozpin-olioz ongi busti kukulu eta entsaladako osagai guztiak. Prest dugu entsadala mahaira zerbitzatzeko.