Sagar tarta

JON URBE  / ARGAZKI PRESS.
Iker Markinez.
2012ko azaroaren 3a
00:00
Entzun
OSAGAIAK

Lau errezil sagar

Litro erdi esne

Dozena erdi arrautza

200 g azukre

50 g irin

Banilla makiltxo bat

Hostopil orea

Azukre eta gurin pixka bat tartarentzat



Krema prestatzeko, lehenik lapiko batean esnea berotzen jarri banilla makiltxoarekin batera, eta, bitartean, arrautzen gorringoak ontzi batean jarri. Azukrea ontzira bota, eta bost minutuz etengabe irabiatu. Ondoren, irina gehitu eta kontu handiz nahastu. Berotutako esnearen erdia ontzira bota, eta ondo nahastu.

Lapikoan gelditu zaigun esnea irakin artean berotu. Banilla makiltxoa kendu ondoren, ontzian duguna lapikora irauli. Bost minutuz irakiten eduki, etengabe nahastuz. Garrantzitsua da tarta prestatzen hastean krema hotza egotea; beraz, denbora batez hozkailuan sartu edo, bestela, hurrengo egunean hasi tarta prestatzen.

Errezil sagarrak zuritu, eta erditik moztu, goitik behera xafla finetan. Hostopil orea mahai gainean (aurrez irin pixka bat botata) jarri, eta arrabol baten laguntzaz ongi luzatu. Ondoren, laukiluze forman moztu, daukagun labeko erretiluaren luzerakoa. Labeko erretiluan jarri, eta pastelgintzako mahuka baten laguntzaz, hoztutako kremaz hostopilaren erdian bi marra lodi luze marraztu. Horien gainean, sagar xaflak kokatu, bata bestearen ondoan. Gurin zatitxoak eta azukre pixka bat ere bota sagarren gainean. Horrek bukaeran kolore biziagoa emango dio tartari. Labea berotzen jarri, eta beroa dagoenean, sartu 180 gradutan. Bertan eduki, 20 edo 25 minutuz. Atera eta prest daukagu.Epela dagoenean jaten badugu, askoz goxoagoa egongo da. Konfiturarik ez diogu bota; batez ere, sagarren zapore naturala dastatzeko.
Iruzkinak
Ez dago iruzkinik

Ordenatu
0/500
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.